Misserisvarnir nemenda við Háskólann á Bifröst eru á meðal þess sem veitir skólanum sérstöðu í samanburði við aðra háskóla. Þessi siður; að nemendur, kennarar og starfsfólk hittist á vorin og rýni til gagns málefni líðandi stundar. hefur fylgt Háskólanum á Bifröst frá upphafi.

Misserisvarnir felast í því að nemendur koma sér saman um rannsóknarverkefni. Úrvinnsla hvers verkefnis þarf að uppfylla skilyrði um fræðileg vinnubrögð og niðurstöðuna þurfa hóparnir svo að verja fyrir sérstökum dómnefndum. Hvert verkefni fær síðan einkunn í takti við frammistöðu hvers og eins hóps og er þá bæði litið til fræðilegra vinnubragða og hvernig hópurinn stendur sig í sjálfri vörninni. Eins og gefur að skilja ríkir því bæði spenna og eftirvænting við hverja vörn.

Þessar líflegu misserisvarnir eru öllum opnar og eru áhugasamir hvattir til að mæta. Að þessu sinni fara varnir misserisverkefna fram í Menntaskóla Borgarfjarðar, dagana 22. og 23. maí.

Á meðal áhugaverðra málefna sem krufin verða til mergjar má nefna vörn sem nefnist Byltingarkenndur sparisjóður og fjallar um ástæður þess að Indó sparisjóður hafi átt jafn góðu gengi að fagna og raun ber vitni. Einnig má nefna varnir sem fjalla um leikhús sem hreyfiafl í samfélagsumræðu, hvað réttlæti undanþágu frá samkeppnislögum í nýsamþykktum búvörulögum, um orkuskipti bílaleiguflotans, notkun opinberra stofnana á samfélagsmiðlum og val seljenda á fasteignasala.

Sjá dagskrá misserisvarna hér að neðan:

Misserisverkefni Háskólans á Bifröst varin í Hjálmakletti