Mæla með að vellinum verði hnikað til og hann færður nær Akraneshöll og grasbrekku

Stjórn Knattspyrnufélags ÍA hefur nú tekið formlega afstöðu til hugmynda um skipulag og fyrirhugaðar framkvæmdir á íþróttasvæðinu á Jaðarsbökkum. Í bréfi sem stjórnin sendir bæjaryfirvöldum á Akranesi 2. maí síðastliðinn kemur fram að stjórnin hafi með opnum huga skoðað þær hugmyndir sem uppi hafa verið um framkvæmdir á knattspyrnusvæðinu. „Félagið leggur áherslu á þá hagsmuni sem felast í góðri keppnis- og æfingaaðstöðu. KFÍA hefur skoðað hugmyndir um legu aðalvallar, en settar hafa verið fram vangaveltur um óbreytta legu annars vegar og snúning vallar um 90 gráður hins vegar. Formlegar tillögur hafa ekki verið lagðar fram. Öllum á þó að vera ljóst að endurnýjun undirlags og yfirborðs vallarins er löngu tímabært og því mikilvægt að hefjast handa við þá framkvæmd sem allra fyrst.“

Þá segir í samþykkt stjórnar: „Það er afdráttarlaus niðurstaða stjórnar KFÍA eftir ítarlega skoðun að halda Akranesvelli í núverandi legu, en fellst á að honum verði hnikað nær Akraneshöll og grasbrekku. Snúningur vallarins um 90 gráður er að mati stjórnar félagsins ekki góð lausn út frá þörfum félagsins til framtíðar.“

Stjórnin leggur fram ýmis rök fyrir þessari niðurstöðu sinni. Meðal annars að með snúningi vallarins verði þrengt mikið að framtíðarmöguleikum aðalvallar, völlurinn verði opinn fyrir allan vind af hafi og að mjög þröngt verði um göngustíg meðfram Langasandi. Þá muni með snúningi vallarins svæðið sem heild eiga vaxtarmöguleika í takti við breyttar kröfur keppnisvalla og leyfiskerfi þar að lútandi.

Með því að halda núverandi legu vallarins, en með tilfærslu hans eins og fyrr segir, telur stjórn KFÍA að hægt verði að gera vallaraðstæður þannig úr garði að leikvangurinn hafi eðlilegt og nægjanlegt rými til að uppfylla þær kröfur sem gerðar eru til valla í B-flokki, skv. reglugerð KSÍ um knattspyrnuleikvanga. Með því móti verði sömuleiðis hægt að tryggja góða aðstöðu félagsins, iðkenda og áhorfenda og um leið taka tillit til framþróun svæðisins og að völlurinn verði þá betur rammaður inn fyrir vindi.

Loks segir í bréfi KFÍA til bæjaryfirvalda: „Stjórn KFÍA er reiðubúin til samstarfs við Akraneskaupstað um skipulagningu og framkvæmdir á íþróttasvæðinu á ofangreindum forsendum og í samvinnu við fagfólk sem best þekkir til knattspyrnuleikvalla og æfingavalla.“

Stjórn KFÍA vill halda núverandi legu knattspyrnuvallarins á Jaðarsbökkum

Mæla með að vellinum verði hnikað til og hann færður nær Akraneshöll og grasbrekku

Mæla með að vellinum verði hnikað til og hann færður nær Akraneshöll og grasbrekku