Keflavík og ÍA áttust við í 16-liða úrslitum Mjólkurbikars karla í knattspyrnu í gærkvöldi og var leikurinn á HS Orku vellinum í Keflavík. Lengjudeildarlið Keflavíkur hafði slegið út lið Víkings Ólafsvíkur og Breiðabliks á leið sinni í 16-liða úrslitin á meðan ÍA hafði unnið sigur á Tindastól í 32-liða úrslitunum.

Skagamenn byrjuðu betur í leiknum og komust yfir strax á fjórðu mínútu þegar Hinrik Harðarson komst inn fyrir vörn Keflavíkur eftir sendingu frá Viktori Jónssyni. Hann potaði boltanum framhjá Ásgeiri Orra Magnússyni markverði Keflvíkingi og lagði boltann í netið. Eftir þetta áttu bæði lið ágætis færi og það besta fékk Hinrik eftir um hálftíma leik þegar hann lék á Ásgeir en setti boltann úr þröngu færi framhjá tómu markinu. Það dró svo til tíðinda nokkrum mínútum síðar þegar Erik Tobias Sandberg varnarmaður ÍA sendi boltann of laust til baka og reif síðan Sami Kamel niður í teignum og fékk að líta rauða spjaldið hjá dómara leiksins sem var frekar harður dómur. Sami steig sjálfur á vítapunktinn og skoraði af miklu öryggi úr vítinu. Á síðustu mínútu fyrri hálfleiks kom fyrirgjöf fyrir mark ÍA þar sem boltinn barst fyrir fætur Sami sem skoraði með föstu skoti af stuttu færi. Staðan 2-1 í hálfleik heimamönnum í vil og nokkuð ljóst að gestirnir áttu erfitt verkefni fyrir höndum í þeim seinni.

Einum færri reyndu Skagamenn að jafna metin og tvisvar kölluðu þeir eftir vítaspyrnu en ekkert var dæmt. Arnór Smárason fékk síðan gott færi á 77. mínútu þegar hann fékk boltann einn og óvaldaður í vítateignum og tók hann á lofti en aðeins of hátt og yfir markið. Fjórum mínútum síðar barst boltinn inn í vítateig Skagamanna, Árni Marinó Einarsson markvörður var eitthvað ragur í úthlaupinu og Valur Þór Hákonarson kom boltanum í netið úr þröngu færi. Frans Elvarsson leikmaður Keflavíkur fékk svo beint rautt spjald á 86. mínútu þegar hann fór í andlitið á Hinriki fyrir framan nefið á Pétri Guðmundssyni dómara leiksins. Lokatölur 3-1 fyrir Keflavík og eina von ÍA um titil þetta árið fokin út í veður og vind.

Næsti leikur ÍA er á móti Fram í Bestu deildinni á Lambhagavellinum í Úlfarsárdal næsta þriðjudag og hefst klukkan 19.15.

Skagamenn úr leik í Mjólkurbikarnum