Nú duga orðin ein og sér ekki lengur

Sveitarstjórn Dalabyggðar vill í nýrri ályktun sinni undirstrika að ástand þjóðvegar 60 í gegnum Dali er þannig að hættuástand varir á veginum meðan ástand hans er eins og raun ber vitni. „Rétt er að nefna í þessu efni að vegurinn um Dalina, þjóðvegur 60, er inngangur að heilum landshluta, Vestfjörðum, svo staðan er ekki einkamálefni Vesturlands eða Dalabyggðar,“ segir í ályktuninni. „Við skorum á alþingismenn, umhverfis- og samgöngunefnd Alþingis, innviðaráðherra sem og Vegagerðina að beita sér af alefli á næstu dögum og vikum með öllum tiltækum ráðum til að fjármagni verði veitt í nauðsynlegar aðgerðir. Nú duga orðin ein og sér ekki lengur. Aðgerða er þörf á árinu 2024, ábyrgð okkar allra er mikil til að tryggja ásættanlegt öryggi á þjóðvegi 60 í gegnum Dalina áleiðis á Vestfirði og Strandir.“

*Mosaík munstur í slitlagi ber vott um ónýtt burðarlag, sagði Bergþóra Þorkelsdóttir vegamálastjóri á fundi með sveitarstjórnarfólki á Vesturlandi nýverið. Ljósm. Halldór Jónsson*

Stjórnvöld brýnd um tengivegina

Sveitarstjórn samþykkti aðra ályktun sem fjallar um tengivegi. „Sveitarstjórn Dalabyggðar gagnrýnir fyrirliggjandi tengivegaáætlun Vegagerðarinnar á svokölluðu Vestursvæði harðlega. Í fyrsta lagi þarf að hraða þeim framkvæmdum sem nú eru á áætluninni, þ.e. Laxárdalsvegi og Klofningsvegi og ná þarf fleiri kílómetrum inn á þá vegi á komandi árum. Aðeins eru 9 kílómetrar sem tengjast framkvæmdum sem nú eru hafnar á Klofningsvegi. Ná þarf enn fleiri kílómetrum hvað þann veg varðar inn á áætlunina m.t.t. atvinnulífs og skólasóknar þeirra sem þar búa. Enn er inn á tengivegaáætluninni úthlutun fjármuna í Steinadalsveg, framkvæmd sem við styðjum, en höfum vakið athygli á að óeðlilegt sé að fjármunir í þá framkvæmd sé útdeilt úr þeim „potti“ sem um ræðir því einn af þeim lykilþáttum sem horft er til varðandi útdeilingu fjármuna úr tengivegapotti er að viðkomandi vegur hafi hlutverk samanber skólaakstur og vinnusókn. Við undirstrikum að við styðjum heilshugar alla uppbyggingu vega í Dalabyggð, hvar sem þeir liggja, en finna þarf aðra leið til að veita fjármagni í þá framkvæmd sem um ræðir og fá þar með þær rúmu 520 milljónir sem í tengivegaáætluninni eru í aðra tengivegi í Dölunum, ekki veitir af.“

Loks segir í ályktun sveitarstjórnar: „Um alla Dalabyggð er skólabörnum ekið um malarvegi sem eru í algjörlega óviðunandi ástandi. Almennt er viðhaldi tengivega innan Dalabyggðar með öllu óviðunandi og rétt er að vekja athygli á því að hlutur Vesturlands innan Vestursvæðis í samgönguáætlun er mjög lítill í samanburði við að Vesturland er um 2/3 af skilgreindu Vestursvæði Vegagerðarinnar sem dekkar Vesturland og Vestfirði. Sveitarstjórn Dalabyggðar skorar á þingmenn, samgöngunefnd Alþingis, innviðaráðherra sem og Vegagerðina að beita sér af öllu afli með okkur í Dalabyggð til að rétta hlut okkar og koma vegakerfinu í Dölunum í ásættanlega stöðu sem allra fyrst.“

Hættuástand varir á Vestfjarðavegi um Dali

Nú duga orðin ein og sér ekki lengur

Nú duga orðin ein og sér ekki lengur