Rætt við Einar Magnús Gunnlaugsson þjálfara Reynis

Reynir Hellissandi spilar annað árið í röð í 5. deild karla í knattspyrnu í sumar en í fyrra endaði liðið í 8. sæti af níu í A riðli með sjö stig úr 16 leikjum. Einar Magnús Gunnlaugsson hefur tekið við keflinu af Ólafi Helga Ólafssyni sem þjálfari liðsins en Ólafur Helgi verður aðstoðarþjálfari Einars í sumar. Blaðamaður Skessuhorns heyrði í Einari í síðustu viku en fyrsti leikur liðsins var á sunnudaginn gegn Smára sem lauk með jafntefli, 1-1.

Einar segir að undirbúningstímabilið hafi byrjað í nóvemberbyrjun og þá hafi þeir æft með Víkingi Ólafsvík, bæði á Ólafsvíkurvelli og í ræktinni, og það hafi komið vel út. Einar segir að leikmannahópurinn sé þokkalega stór, að hluta til staðsettur fyrir vestan og svo séu nokkrir leikmenn búsettir í Reykjavík en hafi tengingu við Snæfellsnes. Einar segir einnig að einhverjar breytingar hafi orðið á hópnum en ekki stórvægilegar og bara svona eins og gengur og gerist.

Nokkrir reynsluboltar bæst við

Nú ert þú nýr þjálfari liðsins. Hvernig líst þér á hópinn og hverjar eru helstu áherslubreytingarnar með komu þinni? „Mér líst mjög vel á hópinn, nokkrir reynsluboltar hafa bæst við í hópinn og þetta er góð blanda af eldri og reyndari leikmönnum og ungum og sprækum strákum. Auðvitað koma alltaf einhverjar breytingar þegar nýir menn koma en við viljum bara bæta okkur frá því í fyrra, bæði hvað varðar vörnina og samspilið hjá liðinu.“

Þið spilið í sumar í B riðli 5. deildar og með ykkur þar eru Afríka, Mídas, Smári og SR af höfuðborgarsvæðinu, KFR, Stokkseyri og Uppsveitir frá Suðurlandi og Hörður frá Ísafirði. Hvernig eru svona ferðir fjármagnaðar og hverjir eru ykkar helstu styrktaraðilar? „Allt er þetta styrkt af fyrirtækjum í Snæfellsbæ sem hafa gert þetta að veruleika. Það er ekkert sjálfgefið að halda úti tveimur meistaraflokkum og frábæru barna- og unglingastarfi í ekki stærra bæjarfélagi. Fyrirtækin eiga hrós skilið fyrir sitt framlag, sem og allir þeir einstaklingar sem hafa komið að þessu.“

Eiga að geta gefið öllum liðunum leik

Hvernig líst þér á ykkar riðil, veistu eitthvað um styrkleika liðanna og hvar þið standið gagnvart þeim? „Mér líst vel á riðilinn og sumarið. Ég er svo heppinn að hafa góða menn með mér sem vita mikið um þessi lið, uppfæra mig og það er enginn betri í því en Ólafur Helgi, aðstoðarþjálfari og „alt mulig mand“ hér hjá Reyni Hellissandi. En ég tel að á góðum degi þá eigum við að geta gefið öllum liðunum leik og við vonum bara að það verði margir góðir dagar í sumar.“

Reynir lék 16 leiki í A riðli 5. deildar á síðasta sumri og fékk á sig 89 mörk, þó 30 mörkum minna en lið Afríku sem fékk flest mörk á sig. Spurður hvort búið sé að stoppa í götin fyrir þetta tímabil segir Einar að hann telji það. „Við erum komnir með reynslumikinn markmann og svo erum við að vinna í því að bæta við okkur miðvörðum og einnig hafa komið inn reyndari leikmenn. Svo já, ég tel að við séum á réttri leið.“

En hver eru helstu markmið sumarsins? „Það er nú bara þetta týpíska, gera betur en á síðasta tímabili, bæði sem einstaklingar og lið. Hafa gaman af þessu og skemmta áhorfendum og okkur. Síðan viljum við hjá Reyni bara þakka öllum þeim sem hafa lagt hönd á plóginn og hjálpað okkur. Vonandi sjáum við sem flesta á vellinum í sumar því góður stuðningur er gulls ígildi. Stuðningurinn hefur verið góður hingað til og vonandi verður hann það áfram,“ segir Einar að endingu.

Leikmannahópur Reynis fyrir fyrsta leik sem var á móti Smára og endaði 1-1.

„Vonandi sjáum við sem flesta á vellinum í sumar“