Með mikið sjálfstraust

Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er Max Alex sem spilar knattspyrnu með Reyni Hellissandi.

Nafn: Maxymilian Alex Bochra

Fjölskylduhagir: Ég bý í Ólafsvík ásamt mömmu minni og pabbi minn kemur oft í heimsókn. Síðan á ég líka kærustu í Stykkishólmi og ég er oft þar hjá henni.

Hver eru þín helstu áhugamál? Mín helstu áhugamál er fótbolti, líkamsrækt og bílar.

Hvernig er venjulegur dagur hjá þér um þessar mundir? Á virkum dögum byrja ég á því að keyra til Grundarfjarðar í skólann. Síðan eftir skóla fer ég heim, slaka aðeins á, fæ mér að borða, fer aðeins yfir námið og fer í ræktina. Síðan fer ég aftur heim og fæ mér að borða og fer svo á fótboltaæfingu. Eftir æfingu er misjafnt hvað ég geri.

Hverjir eru þínir helstu kostir og gallar? Ég myndi segja að ég sé frekar snyrtilegur og vil alltaf hafa allt hreint í kringum mig. Einnig er ég ekki feiminn, er með mikið sjálfstraust og er vinnusamur. Mínir gallar eru að ég á erfitt með að vakna snemma á morgnana og á erfitt með að skipuleggja mig.

Hversu oft æfir þú í viku? Ég fer á æfingar sirka 4-5 sinnum á viku en æfingarnar eru frekar breytilegar. Síðan reyni ég að fara í ræktina á hverjum einasta degi.

Hver er þín fyrirmynd í íþróttum? Fyrirmyndir mínar í knattspyrnu eru Jude Bellingham og Trent Alexander-Arnold.

Af hverju valdir þú knattspyrnu? Ég valdi knattspyrnu vegna þess að pabbi minn hefur alltaf haft mikinn áhuga á fótbolta og hann hvatti mig til þess að byrja að æfa þegar ég var ungur.

Hver er fyndnastur af þeim sem þú þekkir? Mér finnst félaginn minn Björn Óli mjög fyndinn.

Hvað er skemmtilegast og leiðinlegast við þína íþrótt? Það skemmtilegasta við fótbolta er að spila leiki, þegar þjálfarinn setur upp skotæfingu og að fá að hitta liðsfélagana mína. Það leiðinlegasta við fótbolta er hvað maður meiðist oft og þegar það eru hlaupæfingar.