Á bænum Helgavatni í Þverárhlíð standa yfir framkvæmdir við byggingu nýs þúsund fermetra fjóss sem er áfast eldra fjósinu. Það eru bræðurnir Bjarki og Diðrik Vilhjálmssynir sem standa að verkinu, en þeir eru nú að taka við búi af föður þeirra, föðurbróður og eiginkonum þeirra. Þeir Bjarki og Diðrik segjast vinna að framkvæmdinni á milli mjalta en framkvæmdir fóru á fullt skrið á þessu ári.

„Við munum stækka búið um 40-50 kýr og verða þá allt í allt um 120 kýr hér. Við verslum í heimabyggð með allt hráefni í nýbygginguna en róbótarnir sem koma síðan inn í nýja fjósið verða reyndar erlendir,“ segir Diðrik en þegar nýja fjósið verður klárt ætla þeir bræður að einhenda sér í að taka í gegn elsta hluta fjóssins. „Elsti hlutinn er frá árinu 1963 en allir veggir og slíkt eru mjög heillegir. Við munum taka gamla fjósið aðeins í gegn til að koma því nær nútímanum og þá tökum við kannski smá pásu í framkvæmdum, nema okkur detti eitthvað sniðugt í hug,“ segir Bjarki og brosir.

*Bjarki, Diðrik og Vilhjálmur Diðriksson yngri við grunninn að nýja fjósinu.*

Vinna milli mjalta við nýja fjósbyggingu