Viðtal úr safni Skessuhorns frá árinu 2006

Systurnar Drífa og Brynja Baldursdætur eru fæddar með árs millibili og hafa alltaf verið samrýndar. Árið 2004 kom í ljós að þær ættu báðar von á sínu öðru barni. Fæðingardagurinn var settur með mánaðar millibili en báðar áttu þær börnin á Valentínusardaginn, þann 14. febrúar á síðasta ári. Börnin voru fædd 11 og 7 vikum fyrir tímann og vógu aðeins 6 og 9 merkur. Í ár urðu þær aftur barnshafandi á svipuðum tíma. Drífa og Brynja sögðu blaðamanni Skessuhorns frá þessari ótrúlegu tilviljun.

“Okkur fannst alveg nógu merkileg tilviljun að það ætti bara að vera mánuður á milli fæðingardaganna,” segir Brynja og hlær. “Hildur Arney, dóttir Drífu, átti að fæðast 29. apríl og Einar Magni, sonur minn, þann 26. mars. Auðvitað var rosalega gaman að vera svona samferða.” Það vill reyndar þannig til að þær systurnar eru alls fjórar og þær þrjár elstu hafa alla tíð fylgst að í barneignum. “Anna systir okkar og ég áttum okkar fyrstu börn með þriggja mánaða millibili,” segir Brynja. “Þegar Drífa varð ófrísk að sínu fyrsta barni reyndist Anna eiga von á sínu öðru. Þau fæddust með tveggja mánaða millibili. Svo fæðast þessi tvö sama daginn og loks urðum við Drífa ófrískar í ár. Ég átti í september en hún er skrifuð í febrúar. Engin okkar hefur náð að ganga með fram að áætluðum fæðingardegi og í hvert skipti kemur alltaf sitt hvort kynið!”

Fæddust með 5 klukkustunda millibili

Þrátt fyrir þessa runu tilviljana átti enginn von á því sem gerðist umræddan Valentínusardag. Drífa hafði legið inni á Landspítalanum í fimm vikur áður en að fæðingunni kom. “Þegar ég var komin tæpar 24 vikur á leið kom í ljós að ég var með leghálsbilun og læknarnir sáu fram á að Hildur gæti fæðst hvað úr hverju. Ég var því lögð inn og þurfti að liggja fyrir það sem eftir var meðgöngunnar. Ég var búin að vera þar í um mánuð þegar vatnið fór að morgni sunnudagsins 13. febrúar, en ekkert gerðist fyrr en upp úr kvöldmat. Hildur var svo fædd fimm mínútur yfir miðnætti.”

Brynja fór upp á Sjúkrahús Akraness klukkan 2 að nóttu og Einar Magni var fæddur innan við þremur klukkustundum síðar. “Ég fékk svokallað fylgjulos og var keyrð inn á deild án þess að hafa talað við neinn í fjölskyldunni. Ég ætlaði nú ekki að fara að láta mannskapinn hafa áhyggjur af mér þegar Drífa var nýbúin að eignast eitt stykki Þumalínu!”

“Nei, þú varst að eiga barn!”

Einar Magni eyddi fyrstu klukkustundum lífs síns á Akranesi en var svo fluttur þaðan til Reykjavíkur í sjúkrabíl. Í bílnum var hjúkrunarkona sem átti erfitt með að átta sig á aðstæðum. “Ég var að reyna að segja henni að systir mín hefði verið að eiga barn en hún horfði bara á mig og sagði blíðum rómi: Nei, elskan – þú varst að eiga barn,” segir Brynja og hlær. “Ég hélt áfram að reyna að segja henni hvað ég hefði miklar áhyggjur af Hildi en hún benti bara á Einar og reyndi að sannfæra mig um að hann hefði það bara fínt.”

Drífa átti líka bágt með að trúa fréttunum í fyrstu. “Ég var á allt annarri deild af því ég var gengin svo stutt. Við vorum á vökudeildinni til um það bil klukkan þrjú um nóttina. Svo fórum við bara að sofa. Þegar ég vaknaði um morguninn og leit á símann sá ég að Anna systir var mikið búin að reyna að ná í mig. Ég hringdi í hana og hún sagði mér að Brynja væri líka búin að eiga. Ég hélt þetta væri einhver lélegur brandari og var ekki alveg að skilja húmorinn.”

Flökkusaga á Vestfjörðum

Hildur Arney fæddist 11 vikum fyrir tímann, var 6 merkur og 41 cm. Einar Magni fæddist tæpum 7 vikum fyrir tímann, var 9 merkur og 42 cm. Litlu frændsystkinin vöktu athygli á sjúkrahúsinu. “Þau voru kölluð Valentínusartvíburarnir á vökudeildinni og þetta þótti rosalega sætt. Sú tillaga kom strax upp að láta fjölmiðla vita af þessu en við vildum fá frið svona til að byrja með. Við vorum samt alveg heimsfrægar á spítalanum,” segir Brynja og skellihlær. Drífa bætir því við að starfsfólkið hefði haft orð á því að svona tilfelli hefði aldrei komið upp áður. “Mér skilst að einhvern tímann hafi systur átt á svipuðum tíma en aldrei fyrirbura. Eiginlega fannst mér það fyndnast þegar frænka okkar sem býr fyrir vestan heyrði sögu úti í bæ um systurnar sem höfðu eignast fyrirbura sama daginn. Þetta var orðin flökkusaga á Vestfjörðum!”

Fengu að vera saman í stofu

Sjálfar tóku systurnar aðstæðunum með jafnaðargeði. “Það þykir mjög skrítið að liggja með systur sinni en við töluðum varla um þetta. Það gerðist svo hratt og var svo mikið brjálæði allt saman. Við eyddum dögunum í að mjólka okkur á milli þess sem við gáfum börnunum uppi á vökudeild. Drífa trillaði mér um allt í hjólastól og við fengum að vera saman í stofu,” segir Brynja og Drífa bætir því við að systurnar hafi haft mikinn stuðning hvor af annarri. “RS vírusinn var búinn að vera skæður á þessum tíma. Þess vegna var búið að herða reglur um heimsóknir mjög mikið. Systir okkar mátti ekkert koma og mamma og pabbi fengu rétt að stinga inn nefinu. Að því frátöldu kom enginn í heimsókn.”

Brynja viðurkennir að sjúkrahúsvistin hafi engu að síður verið erfið að mörgu leyti. “Ég var hræðileg á spítalanum, fannst allt ómögulegt og grenjaði yfir öllu. Aumingja Drífa, sem átti í raun miklu meira bágt, var alltaf milliliður milli mín og ljósmæðranna.” Drífa samsinnir því og hlær: “Þær sögðu alltaf: “Heldurðu að systir þín vilji hitt og þetta?” En þetta var allt miklu meira áfall fyrir Brynju. Ég var búin að vera að undirbúa mig undir að eiga fyrirbura vikum saman og hafði fengið tilheyrandi fræðslu. Þetta gerðist bara einn, tveir og þrír hjá Brynju.”

Konur með risastór börn

Systurnar segja að þótt starfsfólk Landspítalans hafi staðið sig vel hefði margt mátt betur fara þessa fyrstu daga. “Það er mjög léleg aðstaða á spítalanum, bæði fyrir foreldra fyrirbura og foreldra veikra barna,” segir Drífa. “Starfsfólkið gerir sitt besta en það hefur náttúrulega ekki tök á að taka mann í sálfræðitíma. Svo situr maður niðri á sængurkvennagangi þar sem konurnar sitja í röðum með risastóru börnin sín. Maður var eitthvað svo týndur.”

Einar Magni fékk að fara heim af sjúkrahúsinu eftir tvær vikur en Hildur Arney fékk ekki að fara heim fyrr en eftir tvo mánuði. Þá vóg hún aðeins 2,8 kg. “Hún var fjögurra mánaða þegar hún náði fæðingarþyngd sumra barna,” segir Drífa.

Hraust og heilbrigð

Þótt frændsystkinin séu fædd fyrir tímann eru þau bæði hraust og heilbrigð. “Það hefur ekki verið neitt meira að henni en öðrum börnum,” segir Drífa um dóttur sína. “Hún verður veik en heldur í við jafnaldra sína í þroska þótt hún sé töluvert minni en þeir.” Brynja segir það með ólíkindum hversu lík börnin eru. “Þau eru alltaf nákvæmlega jafnstór og jafnþung. Svo tóku þau fyrstu skrefin með aðeins eins dags millibili þótt hann hafi reyndar verið lengur að læra að labba. Það er alveg ótrúlegt hvað Hildur er dugleg í einu og öllu.”

Brynja er búsett á Akranesi en Drífa í Reykjavík. “Það er spurning hvernig við skipuleggjum afmælisveislurnar í framtíðinni,” segja þær og hlæja. “Kannski við sláum þessu bara saman þótt þetta yrðu líklega 50 manna veislur með öllu föðurfólkinu!”

SÓK

Börn systranna. Vinstra megin sitja börn Drífu, Hildur Arney og Benedikt. Emilía Anna, elsta dóttir Brynju, situr með nýfæddan bróður sinn Arnar Pálma og lengst til hægri er Einar Magni.

Systur áttu fyrirbura sama daginn