Fjölmenni var mætt í Borgarneskirkju í gær. Fyrir hádegi var 65 ára vígsluafmæli kirkjunnar, en eftir hádegi var hún svo formlega friðlýst af ráðherra. Borgarneskirkja er um leið fyrsta mannvirkið í Borgarnesi til að hljóta friðlýsingu.

Við friðlýsingarathöfnina steig Guðlaugur Þór Þórðarson, umhverfis- orku- og loftslagsáðherra fyrstur í pontu. „Ég ólst upp við það að þetta væri fallegasta kirkja landsins og mér finnst það ennþá,“ sagði Guðlaugur, en hann talaði einnig um hversu mikilvægt það væri að leggja áherslu á að vernda og friðlýsa gamlar byggingar, til að halda menningunni og sögu á lofti fyrir komandi kynslóðir. Séra Þorbjörn Hlynur Árnason steig næstur í pontu en hann var sóknarprestur á Borg í um fjóra áratugi og lengi prófastur Vesturlandsprófastsdæmis að auki. Séra Þorbjörn talaði um hversu mikil samheldni hafi verið í íbúum í Borgarnesi þegar kirkjan var byggð. „Það var ekki auðvelt að koma hingað, upp bröttustu götu Íslands, Bröttugötu. Íbúar komu hingað til að hjálpa, komu til að skafa timbur, aðstoða iðnaðarmenn og voru það ungir jafnt sem aldnir sem tóku höndum saman,“ rifjaði hann upp.

Pétur Ármannsson og Björn Jón Björnsson fóru að endingu með erindi um kirkjuna sjálfa og arkitektinn, Borgnesinginn Halldór H. Jónsson, sem gaf vinnu sína við hönnun kirkjunnar. Að endingu undirritaði Guðlaugur Þór friðlýsingu Borgarneskirkju í blíðskaparveðri á kirkjuholtinu í Borgarnesi.

Borgarneskirkja er nú friðlýst