Peningastefnunefnd Seðlabanka Íslands tilkynnti í morgun um þá ákvörðun sína að halda stýrivöxtum óbreyttum í 9,25%. Þannig hafa þeir verið frá því í ágúst á síðasta ári. Næsti vaxtaákvörðunardagur verður ekki fyrr en í ágúst. Í yfirlýsingu stofnunarinnar kemur m.a. fram að verðbólga hefur áfram hjaðnað og mældist 6% í apríl. Verðbólga án húsnæðisliðar hefur þó minnkað hraðar og er undirliggjandi verðbólga komin í 5%. „Verðbólguvæntingar hafa lækkað á suma mælikvarða en eru enn yfir markmiði. Hægt hefur á vexti innlendrar eftirspurnar enda er peningalegt taumhald þétt og horfur eru á að það dragi úr hagvexti í ár. Spenna í þjóðarbúskapnum er þó meiri en áður var talið og verðbólga minnkar því hægar samkvæmt nýrri spá Seðlabankans.“