Landsvirkjun hefur nú lagt að mestu af skerðingar á afhendingu raforku til stórnotenda. Undanskilið eru fiskþurrkunarverksmiðjur og gagnaver fyrir rafmyntagröft. Fram kemur í tilkynningu frá Landsvirkjun að þetta er um 3-5 vikum fyrr en reiknað hafði verið með um miðjan síðasta mánuð. Staða í miðlunarlónum Landsvirkjunar batnar nú nokkuð ört og mikill snjór á hálendinu gefur fyrirheit um gott innstreymi í lónin á næstu vikum.

Fram kemur í tilkynningu Landsvirkjuanr að undanfarið hafi hlýindi í veðri skilað auknu innrennsli, t.d. á vatnasvæði Tungnaár á Suðurlandi. Niðurdrætti í Þórisvatni virðist lokið þetta vorið. Langtíma veðurspá fyrir Suðurland lofar hlýindum og þá tekur Þjórsá fljótt við sér. Við Blöndulón hafa verið miklar leysingar að undanförnu og það rís hratt. „Hálslón við Kárahnjúka er önnur saga, þar hafa litlar breytingar orðið upp á síðkastið. Hins vegar er snjór mikill á Austurlandi og varfærnar spár okkar gera ráð fyrir auknu innrennsli þar á næstunni. Gert er ráð fyrir að lofthiti á landinu verði um eða yfir meðallag næstu þrjár vikurnar. Gangi það eftir má búast við því að staða lónanna batni hratt,“ segja forsvarsmenn Landsvirkjunar.

Undir lok síðasta árs var gripið til skerðinga á afhendingu víkjandi orku til fiskimjölsverksmiðja og fiskþurrkana, auk gagnavera sem stunda rafmyntagröft. „Þessar skerðingar munu standa áfram, enda engin umframorka tiltæk þótt staðan fari batnandi að öðru leyti. Því næst var afhending skert til fjarvarmaveitna og stórnotenda, þ.e. Elkem, Norðuráls og Rio Tinto. Í febrúar var svo tilkynnt um skerðingar á norður- og austurhluta landsins en þær náðu til álvers Alcoa Fjarðaráls, kísilvers PCC Bakka, TDK aflþynnuverksmiðjunnar og atNorth gagnaversins. Þessum skerðingum er núna lokið. Landsvirkjun þakkar viðskiptavinum sínum gott samstarf og þolinmæði við þær krefjandi aðstæður sem ríkt hafa í vatnsbúskapnum í vetur.“

Skerðingum raforku til flestra stórnotenda hefur verið hætt