Árið 1924 þann 3. maí fæddist Soffanías Cecilsson á Búðum í Grundarfirði. Foreldrar hans voru hjónin Kristín Runólfsdóttir og Cecil Sigurbjarnarson. Hann var einn fimm systkina sem fæddust þar en þau misstu föður sinn í sjóslysi þegar Soffi var ungur. Soffi hóf útgerð 12 ára gamall þegar hann og Bæring bróðir hans keyptu bát. Soffanías tók 15 tonna skipstjórnarréttindi árið 1946 og þremur árum síðar keyptu bræðurnir 38 tonna bát sem þeir nefndu Grundfirðing. Þar hófst útgerðarsaga Soffaníasar sem tók stóran þátt í að móta bæinn Grundarfjörð og gera hann að því blómlega útgerðarstað sem hann er. Soffanías var einn þeirra sem tóku þátt í uppbyggingu bæjarins með útgerð sinni og fiskvinnslu og tók hann mikinn þátt í félagsmálum. Eftirlifandi eiginkona Soffa er Hulda Vilmundardóttir og börn þeirra eru Magnús, Kristín og Sóley en fyrir átti Hulda eina dóttur, Bryndísi Vilhjálmsdóttur.