Rætt við Skarphéðin Magnússon þjálfara kvennaliðs ÍA

ÍA leikur í Lengjudeild kvenna í knattspyrnu í sumar eftir að hafa endað í 2. sæti í 2. deild á síðasta tímabili. Aðalþjálfari liðsins síðustu tvö ár var Magnea Guðlaugsdóttir en hún lét af störfum eftir síðasta tímabil og við starfinu tók Skarphéðinn Magnússon sem hefur þjálfað hjá ÍA undanfarin tíu ár. Blaðamaður Skessuhorns heyrði í Skarphéðni í liðinni viku en fyrsti leikur ÍA verður á móti Grindavík næsta mánudag í Akraneshöllinni.

*Skagakonur stilltu sér upp fyrir æfingu síðasta föstudag.*

Nú tókstu við liðinu af Magneu síðasta haust. Hvernig var að koma inn í þennan hóp og þekktirðu eitthvað til leikmannanna? „Það gekk mjög vel að koma inn í þennan hóp enda frábær hópur. Ég hef starfað fyrir ÍA í meira en tíu ár svo ég þekki þennan hóp mjög vel og hef þjálfað flestar stelpurnar áður í yngri flokkum og fylgst með þeim þegar ég var ekki að þjálfa þær. Svo ég taldi mig vita að hverju ég væri að ganga með að taka við liðinu því ég veit hvað býr í þessum hópi. Þær eru samt alltaf að koma manni á óvart með því hvað þær eru til í að leggja á sig og eiga þær hrós skilið fyrir það.“

Var einhver breyting á undirbúningstímabilinu með komu þinni og á hvaða hátt? „Hver þjálfari er með sínar áherslur og ég kom með mínar. Með mér í þjálfarateyminu eru Þorsteinn Magnússon, aðstoðar- og markmannsþjálfari, Aldís Ylfa Heimisdóttir aðstoðarþjálfari og Eva María Jónsdóttir sjúkraþjálfari, sem hafa svo sannarlega einnig sett lit sinn á hvað við erum að gera og hvernig. Við höfum æft mjög vel og tel ég að við höfum aukið æfingaálag á þær frá því sem þær eru vanar. Við erum búnar að lyfta og hlaupa mikið í vetur sem mun skila okkur góðum árangri í sumar.“

Spila inni í höll í sumar

Heimaleikir ÍA í Lengjudeildinni í sumar verða spilaðir í Akraneshöllinni og segir Skarphéðinn að það sé vegna þess að Akranesvöllur sé ekki nógu góður og allt að því að vera ónýtur. „Grasið er lélegt á honum og það er ekki nógu góð aðstaða til að bleyta hann fyrir leiki svo sé hægt að spila skemmtilegan fótbolta á honum. Þessi völlur ber síðan ekki það að tvö lið séu bæði að æfa og spila á honum. Það er leyfilegt að spila inni í Akraneshöll í Lengjudeild kvenna og því spilum við þar. Þar er hægt að bjóða upp á frábæra aðstöðu til að spila skemmtilegan fótbolta. Akranesvöllur er með frábæra sögu en hann er barn síns tíma. Það er mjög mikilvægt að það verði tekin ákvörðun fljótt hvað á að gera við hann. Mitt mat er að það eigi að setja á hann gervigras sem fyrst.“

Nú hafið þið styrkt liðið með þremur nýjum útlendingum á meðan einhverjar hafa horfið á braut. Ertu sáttur við hópinn eða er von á meiri styrkingu fyrir mót? „Það hafa orðið miklar breytingar á hópnum frá síðasta sumri. Samira Suleman, Unnur Ýr Haraldsdóttir, Aníta Sól Ágústsdóttir, Róberta Lilja Ísólfsdóttir og Jaclyn Poucel sem allar áttu sæti í byrjunarliðinu síðasta sumar eru ekki lengur með okkur. Hins vegar hafa ungu stelpurnar stigið upp og staðið sig frábærlega og tekið miklum framförum í vetur. Meðalaldurinn í hópnum hjá okkur er 19 ár. Við höfum líka eins og þú segir fengið þrjá erlenda leikmenn sem hafa aðlagast hópnum vel og erum við gríðarlega ánægð með þær líka. Við eigum ekki von á því að fá inn fleiri leikmenn fyrir mótið enda er hópurinn mjög vel samsettur. Með þennan hóp af leikmönnum sem við höfum í dag erum við í toppmálum.“

Skarphéðinn segir einnig að deildin í sumar verði mjög áhugaverð, þar séu mörg jöfn lið og það sé erfitt að segja hvaða lið verða í toppbaráttu þar sem þetta sé deild þar sem nánast öll liðin geta unnið hvert annað. Spurður um markmið liðsins í sumar segir hann að markmiðið sé skýrt; að fara í alla leiki til að vinna þá og skapa öfluga liðsheild.

Stolt af stelpunum

Lengjudeildin hefur verið að styrkjast mikið á undanförnum árum. Það hlýtur að vera gleðiefni að vera komnar þangað aftur? „Já, stelpurnar gerðu virkilega vel síðasta sumar að koma sér upp í Lengjudeildina. Hún er töluvert sterkari en 2. deildin og eigum við klárlega heima í Lengjudeildinni.“

Eitthvað að lokum sem þú vilt segja? „Hópurinn okkar er allur skipaður Skagastelpum sem hafa farið í gegnum yngri flokka starf félagsins fyrir utan þrjá erlenda leikmenn og erum við gríðarlega stolt af því. Ég hvet þess vegna alla til að koma á leiki hjá stelpunum í sumar og styðja þær,“ segir Skarphéðinn að endingu.

„Við eigum klárlega heima í Lengjudeildinni“

Rætt við Skarphéðin Magnússon þjálfara kvennaliðs ÍA

Rætt við Skarphéðin Magnússon þjálfara kvennaliðs ÍA