Hætti dagvinnu sem kennari og gerðist leiðsögumaður og heldur nú úti fyrirtækinu Loa Tours

Um miðjan apríl á síðasta ári stofnaði Sigríður Ólöf Sigurðardóttir, oftast kölluð Sigga Lóa, fyrirtækið Loa Tours í Stykkishólmi. Hún hefði verið duglega að ganga á fjöll síðastliðin ár og hafði verið öflug að bjóða vinum og ættingjum með sér í ferðir. Í þessum ferðum bauð Sigga oftar en ekki upp á dýrindiskaffi, bakkelsi og jafnvel freyðivín ef þannig bar undir. Hún fann að það væri tækifæri á að bjóða upp á slíka þjónustu og ákvað að hætta störfum sínum í Grunnskólanum í Stykkishólmi. Sigga ásamt páfagauknum Bíbba tók á móti blaðamanni en hún var þá að skipuleggja komandi daga í fyrirtækinu. „Ég er garðyrkjufræðingur en ég stundaði nám við Skrúðgarðyrkjubraut við Garðyrkjuskólann á Reykjum en var búin að vera að vinna í tíu ár sem kennari hér við Grunnskólann í Stykkishólmi,“ segir Sigga þegar hún hellir upp á kaffi, með Bíbba á öxlinni.

*Gönguferð að Búðum. Ljósm: loatours.is*

Ástríða fyrir náttúru

Út um stofugluggann blasir við fjallagarður Snæfellsness. Fuglar eru fyrir utan gluggann hjá Siggu Lóu og er einn þeirra nokkuð ágengur. „Þetta er svona heimalningur hjá mér. Hann er búin að vera að koma hérna til að fá æti hjá mér og hann hefur verið að koma með ungana sína einnig til að fá mat. Allavega held ég að þetta séu ungarnir hans,“ segir Sigga og hlær. En hvernig fór þetta verkefni af stað hjá henni? „Ég hef alltaf haft mikla ástríðu fyrir náttúrunni og gróðri, byrjaði að ganga á fjöll fyrir nokkuð mörgum árum og hef mikla ánægju af að ganga á fjöll. Ég reyni þá að njóta í stað þess að keppast við að til dæmis ná ákveðið mörgum tindum á ákveðnum tíma eða að ná einhverjum tindi á einhverju fjalli á ákveðnum tíma. Mér langar til að njóta þess að vera í náttúrunni, fara úr skóm og sokkum og dýfa þeim í kaldan læk eða anda að mér fersku fjallalofti,“ segir Sigga Lóa þegar hún tekur sopann af fyrsta kaffibollanum, ennþá með Bíbba á öxlinni.

Minn helsti stuðningsmaður

En var ekki töluvert stökk að fara út í fyrirtækjarekstur og hætta kennarastarfinu? „Það var risa stökk, en maðurinn minn, Emil Einarsson, er minn helsti stuðningsmaður og hann hvatti mig áfram. Ég hafði ekki gert þetta ef hann væri ekki að styðja mig áfram í þessu. Ég fann að það var einhver þreyta í mér varðandi kennarastarfið og því ákvað ég að hoppa á þetta. Ég fékk styrk frá Sóknaráætlun Vesturlands sem hjálpaði mér mikið og hef ég verið að sækja um fleiri styrki til að betrumbæta ferðirnar enn meir,“ segir Sigga. Inni á vefsíðu hennar, loatours.is, er að finna úrval þeirra gönguferða sem hún býður upp á. Gönguferðir eru um Berserkjagötu, Drápuhlíðarfjall, Horn á Vatnaleið, kringum Kirkjufell og Lýsuskarð er þar að finna.

*Í gönguferð með Loa Tours. Ljósm: loatours.is*

Fjallageit

Fuglinn Bíbbi fer nú að fljúga út um alla stofuna þegar talið berst að ratleikjum og hópefli. „Það er mjög vinsælt hjá mér, sem ég bjóst ekki við, að panta leiðsögn um Stykkishólm eða að útbúa einhvers konar ratleiki fyrir hópa. Það kom mér skemmtilega á óvart en ég er búin að bæta því inn á heimasíðuna mína. Ég hef kennaramenntun og kann því nokkra skemmtilega leiki og finnst gaman að taka á móti hópum. En ég er fjallageit og vil helst fara með fólk í gönguferðir. Ég er reyndar með draum um að ná mér í tvær geitur og hafa þær með mér í ferðum upp á fjöll. Þá geta þær borið freyðivínið, espresso kaffivélina eða gúrmet kruðiríið. Hægt væri að þjálfa þær upp í þetta verkefni og gæfi mér mikla sérstöðu. En þetta er bara draumur eins og staðan er í dag,“ segir Sigga og hlær.

En hver er áherslan í þessum ferðum hjá Siggu Lóu? „Það er að njóta. Ég hef farið í ferðir þar sem er arkað af stað, stoppað til að troða í sig flatköku með hangikjöti og svo farið aftur af stað. Verið að drífa sig til að ná einhverjum toppi eða einhverjum áfanga. Þetta er ekki svona hjá mér. Ég tek með mér kíki, fuglabók, nanópressu til bjóða espresso kaffi, mósartkúlur og soðið vatn fyrir kaffið. Ég sýni fólki flóru Íslands, eitthvað áhugavert í náttúrunni og að sjálfsögðu tala ég um fuglalífið. Og svo reyni ég að tengja fólk við náttúruna með því að fara úr sokkum og skóm, dýfa fótum í kaldan læk eða leggjast niður og hlusta á fuglasönginn. Það er þessi hæga ferðaþjónusta, „slow tourism,“ sem ég hef áhuga á, að ná að kúpla sig út úr hversdagsleikanum og tengjast náttúrunni,“ segir Sigga.

Fleiri draumar

Sigga Lóa heldur áfram: „Mér langar svo að koma af stað einhvers konar Laugavegi hérna á Snæfellsnesi. Gönguleið sem er þá dagleið, gengið þá til dæmis frá Miðhrauni og út Snæfellsnesið til dæmis. Ég fór til dæmis með hóp upp í Ljósafjöllin og niður inn í Álftafjörð og fannst það einhver sú allra skemmtilegasta leið sem ég hef farið. Það eru fullt af möguleikum fyrir slíkt hér, myndi ég halda, en það er bara að koma því af stað,“ segir Sigga Lóa.

Spennandi ferðamannasumar framundan

Eftir nokkra sopa af espresso kaffinu, með fuglinn Bíbba sem nú er kominn á öxl blaðamanns, fór Sigga að tala um spennandi ferðamannasumar í ár. „Nú er ég búin að breyta ferðunum hjá mér. Ég var með ferðir sem voru heils dagsferðir, með heitum laugum og með viðkomu á veitingastað. En ég fékk nokkrar ábendingar um að hafa göngurnar einfaldar og ég hef nú breytt þeim til hins betra. Var nú fyrir stuttu með ferð fyrir eina konu sem vildi sjá þessa staði sem eru kannski ekki á samfélagsmiðlum eða sem eru þeir vinsælustu hjá erlendum ferðamönnum. Við eyddum heilum degi í að skoða og njóta, þó svo að það hafi verið örlítið kalt undir lok dags en hún var yfir sig hrifin af þessari ferð. Ég get tekið hátt í 16 þátttakendur með mér í fjallgöngur og um 20-25 þátttakendur í þessari innanbæjarleiðsögn hér í Stykkishólmi. Ég er ávallt tilbúin ef það kemur bókun samdægurs og hendi þá frá mér því sem ég er að gera, til þess að fara upp á fjöll,“ segir Sigga Lóa.

Engin lognmolla hjá Siggu Lóu

Hætti dagvinnu sem kennari og gerðist leiðsögumaður og heldur nú úti fyrirtækinu Loa Tours

Hætti dagvinnu sem kennari og gerðist leiðsögumaður og heldur nú úti fyrirtækinu Loa Tours