medium

large

thumbnail

1536x1536

2048x2048

small

custom-size

Ólafsvíkurvaka heppnaðist með ágætum – myndasyrpa

Lokadagur Fjórðungsmóts Vesturlands runninn upp

Mótorhjólaslys í Staðarsveit

Ástand Snæfellsnesvegar hefur aldrei verið verra

Hola!

Þúsund tonnum bætt við strandveiðikvótann

core/paragraph

Nemendur í 8.-10. bekk í Brekkubæjarskóla á Akranesi hafa staðið í stórræðum síðustu vikurnar við undirbúning fyrir uppsetningu á söngleiknum Diskóeyjunni. Stefnt er að frumsýna fimmtudaginn 16. maí fyrir Hvítasunnu og í þessari viku hefjast æfingar í Bíóhöllinni þar sem Diskóeyjan mun eiga sér heimili út maí. Þetta er í fjórða sinn sem Brekkubæjarskóli setur upp verk af þessari stærðargráðu. Árið 2013 var söngleikurinn Elskaðu friðinn sýndur, árið 2016 var það söngleikurinn Græna húsið og árið 2019 söngleikurinn Leitin.

Eitt helsta markmið verkefnisins er að gefa nemendum tækifæri til þátttöku í uppsetningu söngleiks, hvort sem er á sviði í leik, söng, dansi og hljóðfæraleik eða öðrum verkefnum tengdum slíkri uppsetningu.  Að taka þátt í svona ferli felur í sér heilmikið nám og eflir sjálfstraust, samvinnu og sjálfsaga nemenda svo eitthvað sé nefnt.  Áhersla er á að þeir nemendur sem vilja fara á svið fái tækifæri til þess og er allur tónlistarflutningur á sýningum í höndum nemenda. Það eru því alls rúmlega 90 unglingar sem munu koma fram í sýningunni á sviði. Þess utan verður förðun, búningavinna, tækni- og sviðsvinna og kynningarmál í höndum nemenda með leiðsögn kennara. Alls koma tæplega 120 nemendur að sýningunni á einn eða annan hátt.

Hjörvar Gunnarsson og Gunnhildur Vilhjálmsdóttir leikstýra Diskóeyjunni, Nikulás Marel Ragnarsson er tónlistarstjóri, Nína Björk Gísladóttir sér um hár og Sóley Brynjarsdóttir um dansatriðin. Þá er framkvæmdastjórn utan um sýninguna og í henni eru Elinbergur Sveinsson, Helga Kristín Björgólfsdóttir, Hafdís Bergsdóttir og Gunnlaug Birta Þorgrímsdóttir. Blaðamaður Skessuhorns hitti þá Elinberg og Hjörvar til að forvitnast meira um Diskóeyjuna og segja þeir að þetta sé stórt og viðamikið verkefni. „Við erum búnir að leggja allt skólastarfið undir og nánast öll unglingadeildin eða yfir 80% nemenda sem eru að taka þátt í þessu verkefni. Það verður lifandi tíu manna hljómsveit á sviðinu til að upplifun áhorfenda verði sem best í Bíóhöllinni.“

core/image

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2024/04/Diskoeyjan-synd-i-Biohollinni-um-midjan-mai-2-1200x1697.jpg" alt="" class="wp-image-77614"/><figcaption>Iðunn Eybjörg Halldórsdóttir sem er nemandi í 9. bekk bjó til forsíðumyndina á leikskrá Diskóeyjunnar.</figcaption></figure>

Vegleg leikskrá gefin út

Áheyrendaprufur fyrir sýninguna voru í mars og samlestur byrjaði aðeins fyrir páskafrí. Eftir páska byrjuðu æfingar og er æft í skólastofum. „Það er búið að breyta stofunum í leiklistarstofur, söngstofur og allt mögulegt,“ segir Hjörvar. „Svo æfum við dans út í fimleikahúsi og einnig í skólanum. Við höfum verið að aðlaga okkur inn í þau rými sem við getum verið að nota og það hefur bara gengið ótrúlega vel.“ Hjörvar segir einnig að allar æfingar séu á skólatíma og skóladagurinn snúist í kringum sýninguna. „Svo eru nemendur að vinna að leikskrá, vinna leikmuni, búninga, förðun og hár. Einnig eru þau með markaðsefni eins og TikTok, Instagram og þess háttar.“ Beggi bætir við að ætlunin sé að gefa út veglega leikskrá sem verður borin út í öll hús á Akranesi helgina fyrir frumsýningu. „Við erum að leggja lokahönd á hana og hún varð fljótlega úr því að vera bara leikskrá yfir í það að vera heilmikið blað. Þetta verður eiginlega hálfgert skólablað, efni blaðsins verður ekki einungis um sýninguna heldur líka um skólann og skólastarfið.“

Fágunarskóli fyrir þæg og óspennandi börn

Og um hvað er Diskóeyjan? Hjörvar segir að þetta sé leikrit sem er skrifað upp úr plötu eftir Braga Valdimar Skúlason, Óttar Proppé og Memfismafíuna sem kom út árið 2010 og á henni eru 24 lög. „Á þeirri plötu er sögð svona einhvers konar saga og er sýningin okkar leikgerð upp úr því. Við fengum góðfúslegt leyfi hjá höfundum verksins til að vinna með þetta og þannig varð þetta leikrit til. Ég skrifaði handritið upp úr þessum geisladisk þannig að leikritið er nýtt. Diskóeyjan hefur aldrei verið sett upp sem leikrit, alla vega ekki þetta handrit en það hefur verið gerð stuttmynd sem hægt er að sjá á YouTube. Sumir þekkja þessa plötu og aðrir ekki neitt en lagið Það geta ekki allir verið gordjöss kom fyrst sem barnalag á þesssari plötu. Leikritið gerist á diskóeyju þar sem rekinn er fágunarskóli fyrir þæg og óspennandi börn sem stefna á lögfræði og þau eru send þangað til að kenna þeim diskó og eitthvað skemmtilegt. Svo gerist þetta bara í þessari útópísku diskóveröld en þetta er ekki tengt diskótímabilinu. Við förum ekki aftur í þann tíma heldur er þetta meira tónlistarstefnan. Aðalatriðið í sýningunni er einvígi þar sem fólk skorar hvort annað á hólm í diskóeinvígi og er ansi spennandi.“

En hvað gefur svona sýning krökkunum? „Hún gefur alveg helling,“ segir Beggi. „Maður sér það bara á krökkunum hvað þau eru spennt&nbsp; og þetta er mikil lyftistöng fyrir allt skólastarfið. Svo er hellings lærdómur í þessu, allt frá því að þeir sem eru að leika, dansa og syngja mikið eru nánast þéttbókaðir hverja einustu mínútu frá 8-3 á daginn og svo hinir sem að læra förðun, hárgreiðslu, dans og svo sjá um markaðsmálin. Þetta er allt hörku vinna og mikið nám að eiga sér stað hérna.“

Mikil spenna í loftinu

Eins og áður kom fram sér 8.-10. bekkur um sýninguna og þar sem stefnan er að setja upp leikrit á þriggja ára fresti nefnir Hjörvar að þetta sé stóra tækifærið þeirra. „Þetta verður ekki gert aftur fyrr en eftir þrjú ár og það er líka svo mikil fegurð í því, það er geggjað. Þetta er risastórt verkefni og við auðvitað vonum eftir góðri aðsókn. Vonandi er markaðurinn ekki mettaður eftir sýningar hjá Grundaskóla og FVA á þessu ári. Við ætlum að frumsýna fyrir hvítasunnuhelgina og keyra á þetta.“ Beggi bætir við að miðasalan fari fram á netinu á heimasíðu skólans, brak.is. og mikill spenningur sé í loftinu. „Við finnum bara jákvæða strauma og það eru allir mjög peppaðir fyrir þessu verkefni. Við erum mjög bjartsýn og gaman að geta svarað kalli nemenda. Á síðustu árum höfum við oft verið spurð: Ætlum við ekki að setja upp leikrit aftur? Það eru auðvitað komin fimm ár síðan síðast vegna þess að covid setti strik í reikninginn með þetta hjá okkur og því var ákveðið að kýla á þetta núna enda algjörlega kominn tími til.“

Ákveðið tilraunaverkefni

Hjörvar og Beggi koma einnig inn á það að þetta sé í fyrsta skipti sem þetta er gert eins og núna, að skólastarfið sé tekið alveg undir þetta. „Áður var það þannig að það var hefðbundið skólastarf á daginn og svo eftir skóla farið á leikæfingu. Þetta var því ákveðið tilraunaverkefni núna sem við vorum til í að gera og hefur tekist mjög vel hingað til. Maður átti kannski ekki alveg von á því, það var mikil óvissa vegna aðstöðuleysis þar sem salurinn okkar er matsalur og því gátum ekki æft þar. Svo er einnig þessa dagana mikið af framkvæmdum og viðgerðum í skólanum og hávaðinn oft eftir því. Fyrst að Bíóhöllin var laus í byrjun maí þá var ákveðið að sýna þar enda ekki annað í boði. Þó að það sé auðvitað mikill kostnaður við svona stórt stykki þá viljum við alls ekki að miðaverð sé of hátt enda viljum við sjá sem flesta. Við fullyrðum það að þetta verður flott sýning, við erum með ótrúlega flotta hljómsveit, svaka flott dansatriði og þetta verður alvöru skemmtun fyrir alla fjölskylduna. Þetta mun höfða til allra að okkar mati og á að gera það. Við höfum alltaf verið með frumsamin verk og vonandi verður sýningin lóð á vogarskál menningarlífs á Akranesi,“ segja þeir félagar að lokum.

Fréttaveita Vesturlands

Diskóeyjan sýnd í Bíóhöllinni um miðjan maí