Rætt við afmælisbarn dagsins sem barnungur ákvað að gera sjómennsku að ævistarfi

„Ég ætla að verða sjómaður þegar ég verð stór,“ sagði Hallgrímur Ísak Guðmundsson, eða Halli eins og hann er jafnan kallaður, í samtali við blaðamann Skessuhorns vorið 2015. Þá var hann 11 ára en að verða 12. Hann á einmitt afmæli í dag, á fullveldisdaginn 1. maí, verður 22 ára. Halli stóð við þessi orð sem féllu í níu ára gömlu blaðaviðtali; hefur verið viðloðandi sjóinn allar götur síðan og róið ýmist með föður sínum eða öðrum. Á sjónum unir hann sér best og vill helst hvergi annarsstaðar vera. Undanfarið hefur hann róið með Haraldi Jónssyni, Hadda, á Inga Rúnari AK en stefnir á strandveiðar í sumar á Flugöldu AK með föður sínum en einnig á bátnum Stekkjarvík sem hann nú á með bróður sínum Elíasi Hallgrími Guðmundssyni. Þeir Halli og Haddi eru nú langt komnir með grásleppuvertíðina og stefna báðir á strandveiðar að þeim loknum; Haddi á Inga Rúnari, en Halli á Stekkjarvíkinni. Þeir félagar hafa meðal annars stundað grjótkrabbaveiðar undanfarin ár en slíkar tilraunaveiðar hafa verið í gangi um hríð frá Akranesi enda grjótkrabba að fjölga mjög meðal annars inni á Hvalfirði. Þessi nýja krabbategund hér við land kom að líkindum í kjölfestutönkum flutningaskipanna sem lesta og landa á Grundartanga.

Hallgrímur Ísak Guðmundsson, þá tæplega 12 ára, við beitningarstörf. Þá þegar var hann staðráðinn í að verða sjómaður og var byrjaður að safna sér fyrir trillu. Ljósm. úr safni Skessuhorns/ mþh

Ungur í beitningu

En byrjum á að rifja upp viðtal sem tekið var við Halla og birtist í Skessuhorni vorið 2015. Þá stóð Halli einbeittur uppi á fiskikassa í beitningarkúr föður síns á Akranesi. Gefum Magnúsi Þór blaðamanni orðið en hann lýsti því sem fyrir augu bar: „Línan lék í höndum hans. Hann tók upp öngul með taumi og línu, hélt honum í hægri hendi, teygði sig eftir bita af makríl sem var til beitu, krækti honum á öngulinn og lagði síðan öngul með beitu, taum og línu snyrtilega á sinn stað ofan í balann sem hann er að beita. Þrátt fyrir að vera nýmættur til starfa þennan dag var hann hálfnaður að beita balann. Þá þegar átti sjórinn hug hans allan.“ Það staðfesti faðir hans Guðmundur Elíasson, Gummi El, sem gerir út bátinn Flugölduna. „Þetta er miklu skemmtilegra en skólinn,“ sagði pilturinn þá en hann hætti ungur í skóla, námið átti ekki við hann. Í þessu viðtali vorið 2015 sagðist Halli beita til að safna sér fyrir báti. „Báturinn minn á að verða trilla sem ég get notað til að veiða fisk norður á Ströndum,“ sagði hann þá.

*Snemma beygist krókurinn. Halli á grásleppuveiðum með föður sínum um borð í Flugöldunni. Hér er hann að greiða aflann úr netunum. Ljósm. úr einkasafni.*

Bræður í útgerð

En hvað er skemmtilegast við sjóinn? „Það er útiveran, en við erum aldir upp við sjó og finnst þetta bara vera hluti af tilverunni. Ég gæti ekki hugsað mér neitt annað til að starfa við,“ segir Halli einbeittur.

En aftur til dagsins í dag: „Ég, pabbi og Elli bróðir keyptum Stekkjarvíkina saman fyrir um sjö árum síðan. Nú eigum við Elli hann einir og ætlum að róa til strandveiða í sumar og gera fyrst út frá Arnarstapa. Síðan þegar líður á sumarið færum við okkur á Patró eða Suðureyri, en það eru allt staðir innan sama strandveiðisvæðis,“ útskýrir Halli. Þannig má segja að Halli, ásamt bróður sínum Elíasi Hallgrími, hafi náð að uppfylla það markmið sem þeir settu sér strax sem smástrákar. Geri aðrir betur.

Haddi og Halli á Inga Rúnari fengu á mánudaginn í síðustu viku níu kílóa grásleppu í netin. Á löggiltri vigt vó hún 8.987 grömm nákvæmlega. Það er með stærri grásleppum. Ljósm. hj

Ungur drengur vildi gerast meðeigandi

Gefum Haraldi orðið: „Þegar ég keypti Færeyinginn minn fyrir um sjö, átta árum síðan, kom lítill stubbur labbandi til mín og spurði; „varstu að kaupa þennan bát?“ Ég svaraði því játandi og þá spyr hann strax; „má ég eiga hann með þér?“ Og ég sagði líka já við því,“ segir Haddi og brosir. „Síðan hefur hann verið að róa með mér hvort sem það er á grásleppu, á strandveiðum eða að leggja grjótkrabbagildrur,“ segir Haddi. Það er kært með þeim félögum. Þeir Haddi og Halli segja það býsna skemmtilegt að veiða grjótkrabba. Þótt þetta sé allt fremur ólíkur veiðiskapur, er eitthvað við það allt; netaveiðar, handfæri eða gildrur. Báðir eru þeir Haraldur og Hallgrímur sjómenn af lífi og sál og segjast hlakka til sumarsins.

*Halli bindur bátinn við löndunarbryggjuna og Haddi bíður átekta.*

*Komið að landi með um um 1200 kíló af grásleppu.*

Byrjaði á beitningu í landi en stundar nú sjóinn

Rætt við afmælisbarn dagsins sem barnungur ákvað að gera sjómennsku að ævistarfi

Rætt við afmælisbarn dagsins sem barnungur ákvað að gera sjómennsku að ævistarfi