Mikið hefur verið að gera í hestamiðstöðinni á Mið-Fossum í Andakíl síðustu daga. Að venju hélt Grani, hestamannafélag nemenda LbhÍ, Skeifudaginn hátíðlegan á sumardaginn fyrsta. Þar var keppt um Morgunblaðsskeifuna og Gunnarsbikarinn eins og undanfarin ár. Nemendur sýndu afrakstur vetrarins en þeir temja trippi ásamt því að þjálfa tamið hross. Grani hélt jafnframt upp á afmæli sitt en nú eru 70 ár frá stofnun félagsins.