Framkvæmdir standa nú yfir við Ólafsvíkurhöfn þar sem verið er að endurbyggja og stækka harðviðarbryggju við Norðurtanga, en bryggjan var upphaflega byggð árið 2007. Búið er að fjarlægja alla dekk- og þybbuklæðningu af eldri bryggju, reka niður 15 bryggjustaura og ganga frá öllu burðarvirki á nýjum hluta bryggjunnar. Nú er unnið við nýtt dekk og þybbuklæðningu ásamt vatns- og raflögnum. Við þessar framkvæmdir stækkar bryggjan um tæplega 200 fermetra. Að sögn Björns Arnaldssonar hafnarstjóra í Snæfellsbæ, verða tveir löndunarkranar staðsettir á bryggjunni og verða þessar endurbætur mjög góð viðbót við löndunaraðstöðu fyrir smábáta í Ólafsvík.