Það var létt yfir sjómönnum á Akranesi sem voru að landa afla sínum síðdegis í gær. Veðrið var með besta móti; logn og vorilmur í lofti. Línubáturinn Eskey var m.a. að landa 12 tonna blönduðum afla en uppistaðan var stór þorskur. Þá kom Ingi Rúnar AK að landi með um eitt tonn af grásleppu en netin liggja nú vestur af Hólmi, skammt frá Akranesi. Haraldur Jónsson á Inga Rúnari kvaðst fagna lengingu gráslepputímabilsins, en ráðherra gaf einmitt úr reglugerð þar að lútandi deginum áður og má hann því veiða 15 dögum lengur. Aflinn á grásleppuvertíðinni er komin í 12 tonn og segist Haddi fá 220 fyrir kílóið af óskorinni grásleppu. Með Hadda á sjó rær Hallgrímur Ísak Guðmundsson háseti.