Á morgun, miðvikudag, verða tvennir áhugaverðir tónleikar haldnir í Tónbergi, sal Tónlistarskóla Akraness. Fyrri tónleikarnir verða kl. 17 og þeir síðari kl. 20. „Tónleikunum svipar til tónleikanna Ungir – gamlir sem voru haldnir um tíma í Bíóhöllinni. Á tónleikunum verða leikin og sungin íslensk dægurlög frá árunum 1960 – 2023. Þar koma fram nemendur skólans á öllum aldri, frá 7 – 67 ára, ásamt kennurum. Kynnir er Andrés Helgason, sem kenndi í mörg ár við skólann okkar en rekur nú Tónastöðina í Reykjavík,“ segir Rut Berg Guðmundsdóttir skólastjóri.