Síðastliðinn laugardag var mikið sungið á Akranesi. Þá fékk Hljómur, kór félags eldri borgara á Akranesi, fjóra gestakóra í heimsókn og blásið var til árlegra söngtónleika í sal Fjölbrautaskóla Vesturlands. Gestakórarnir voru: Eldey á Suðurnesjum, Hörpukórinn í Árborg, Gaflarakórinn í Hafnarfirði og Vorboðar í Mosfellsbæ, alls 150 manns.

„Þarna sýndu og sönnuðu þátttakendur að aldur er enginn hindrun í að viðhalda og efla færni. Lagaval var fjölbreytt og skemmtilegt. Við vorum og erum stolt af kórnum okkar enda starfsemi hans undir stjórn okkar frábæra kórstjóra, Lárusar Sighvatssonar, ómetanlegt. Kærar þakkir öll sem komu að undirbúningi og lögðu fram vinnu við þetta stóra verkefni. Þar mæddi mest á kórnefndinni en það skiptir líka máli hvað margir eru tilbúnir að leggja lið og þjónusta fólk með bros á vör,“ skrifaði Ragnheiður Hjálmarsdóttir að loknum tónleikunum, en eiginmaður hennar, Rögnvaldur Einarsson er formaður Hljóms.

*Hljómur, kór eldri borgara á Akranesi og í nágrenni.*

Fimm kóra mót var haldið á Akranesi