Þriðji leikur Snæfells og Tindastóls, í undanúrslitum fyrstu deildar kvenna, fór fram í Stykkishólmi í gær. Tindastóll hafði unnið tvo fyrstu leiki liðanna en fyrsta liðið til að vinna þrjá sigra fer í úrslit, gegn annað hvort KR eða Aþenu.

Bæði lið virtust vera nokkuð ótengd í byrjun leiks en fjórir tapaðir boltar litu dagsins ljós á fyrstu mínútu leiksins. Snæfell náði að þó forystu, 12-4 undir sterkri leiðsögn Shawnta Shaw leikmanns Snæfells og þjálfari Tindastóls þurfti að taka leikhlé. Tindastóll náði að koma einbeittari úr leikhléi en Snæfell leiddi eftir fyrsta leikhlutann, 14-8.

Eva Rupnik skellti í þriggja stiga körfu í byrjun annars leikhluta en Tindastóll náði því næst að skora sex stig í röð og var komin stemning í hóp Tindastóls. En fyrrnefnd Shawnta Shaw ásamt Dagnýju Ingu Magnúsdóttur kveiktu í risa áhlaupi þar sem Snæfell spilaði agaðan sóknarleik og gríðarlega öflugan varnarleik. Stemningin í íþróttahúsinu í Stykkishólmi var góð og þegar liðin gengu til búningsklefa í hálfleik var staðan 38-20, Snæfelli í vil.

Shawnta Shaw leikmaður Snæfells kom muninum upp í 20 stig í byrjun seinni hálfleiks, 40-20. Tindastóll reyndi að ná einhverskonar áhlaupi í gang en alltaf átti Snæfell svar við þeim hugmyndum. Snæfell spilaði af yfirvegun í sókn en náðu ekki eins mikilli grimmd í varnarleik sínum og náði Tindastóll að skora 18 stig í þriðja leikhluta gegn 15 stigum Snæfells og því staðan fyrir loka leikhlutan, 53-38, Snæfelli í vil.

Mjög snögg fjögur stig frá Tindastól í byrjun 4. leikhluta gerði það að verkum að Baldur Þorleifsson, þjálfari Snæfells þurfti að taka leikhlé. Tindastóll náði að minnka muninn í 55-45 þegar um sex mínútur voru eftir af leiknum og var komin einhver stemning meðal leikmanna gestanna. Snæfell þurfti að taka annað leikhlé til að bregðast við áhlaupi Tindastóls og komu Snæfellskonur grimmari til leiks eftir hléið. Shawnta Shaw fór algjörlega á kostum á síðustu mínútum leiksins. Hún setti niður tíu stig af þeim 13 stigum sem Snæfell skoraði á síðustu fimm mínútunum en einnig var Helga Hjördís Björgvinsdóttir öflug á þessum mínútum en hún stal boltum og greip mikilvæg fráköst fyrir Snæfell. Tindastóll náði ekki að gera frekari atlögu að forystu Snæfells og fór Snæfell með sigur af hólmi, 67-54.

Stigahæstar í liði Snæfells voru Shawnta Shaw með 30 stig, Mammusu Secka var með 13 stig og Eva Rupnik með 8 stig.

Baldur Þorleifsson, þjálfari Snæfells, nefndi í samtali við karfan.is eftir leik að munurinn á þessum leik og leikjunum á undan hafi verið sá að körfuboltinn fékk að fljóta betur á milli leikmanna Snæfells og að leikmenn liðsins hafi spilað sterkari varnarleik. „Ef að við höldum sama hugarfari, skipulagi og grimmd varnarlega, þá getum við jafnað metin á fimmtudaginn,“ sagði Baldur.

Næsti leikur í einvígi Snæfells gegn Tindastóls er fimmtudaginn 18. apríl á Sauðárkróki og hefst hann klukkan 19.15.

Snæfell kom sér inn í einvígið gegn Tindastól