Fyrirtækið Qair á Íslandi boðaði til opins fundar á Hótel Laxárbakka í Leirársveit þriðjudaginn 9. apríl sl. Tilgangur fundarins var að kynna fyrirhuguð áform um svokallað Katanesverkefni; uppsetningu verksmiðju á Grundartanga sem framleiða á rafeldsneyti og umhverfismat henni tengt. Þetta er efnaverksmiðja sem framleiða á ammoníak, en mikil eftirspurn er í heiminum eftir vistvænu ammoníaki sem svo er nefnt.  Undirbúningur verkefnisins virðist nokkuð vel á veg kominn. Umhverfismatsskýrsla liggur fyrir og er aðgengileg á Skipulagsgátt eins og áður hefur komið fram í Skessuhorni. En athygli vakti á fundinum að ekki komu fram skýr svör við því hvernig afla skal nægilegrar orku fyrir starfsemina né heldur hvernig á að sjá henni fyrir nægu vatni.