medium

large

thumbnail

small

custom-size

Frambjóðendur á ferð og flugi

Fundur haldinn vegna verkefnisins Gott að eldast

1536x1536

Sólarhylling heldri borgara

2048x2048

Ellefu gild framboð til embættis forseta Íslands

Naumt tap ÍA gegn FH í spjaldaleik

Kúalaug á Reykhólum fær myndarlegan styrk

core/paragraph

Leiklistarklúbburinn Melló í Fjölbrautaskólanum á Akranesi frumsýndi söngleikinn Grease síðasta föstudag í Bíóhöllinni. Næstu sýningar eru í kvöld, mánudag, og á morgun þriðjudag og er uppselt á þær. Fimmta sýningin verður síðan á föstudag klukkan 20 sem einnig er uppselt á, sjötta sýning er síðan á sunnudag klukkan 17 og sjöunda sýning er á mánudag klukkan 20.

Blaðamaður Skessuhorns fór á forsýningu á Grease síðasta fimmtudagskvöld ásamt þremur börnum á aldrinum 7-14 ára og skemmtu sér allir mjög vel. Það er óhætt að segja að það sé kraftur og fjör í sýningunni frá byrjun til enda. Stuðið byrjar strax í titillaginu Grease með sterku upphafsatriði og lýkur með laginu Ég ætla að næla í þig sem fær fólk til að iða í sætum sínum. Söngatriðin eru öll mjög flott og fjörug og mikill styrkur er að hafa hljómsveit á sviðinu sem gefur lögunum meiri vídd. Dansatriðin í sýningunni lífga ansi vel upp á sýninguna, þau eru ansi vel útfærð og augljóst að krakkarnir eru að njóta sín til hins ítrasta í dansinum.

Ef litið er yfir leikhópinn þá eru auðvitað meðlimir klíkanna tveggja mest áberandi í sýningunni. Jóel Þór Jóhannesson leikur leiðtoga hinna leðurklæddu T-Birds drengja og fer létt með, Helgi Rafn Bergþórsson er Roger eða Botni og er skemmtilega ýktur og þá er Gunnar Smári Sigurjónsson sem leikur Kenickie sannfærandi. Bergþóra Edda Grétarsdóttir leikur hina saklausu Sandy og gerir vel, hún er með fallega rödd og er örugg í leik sínum. Gígja Kristný Stefánsdóttir leikur Rizzo á trúverðugan hátt, Rizzo er bæði viðkvæm og hörð af sér og Gígja túlkar það á sannfærandi hátt. Hinir meðlimir klíkanna standa virkilega vel fyrir sínu og styðja vel við hvert annað í leik og söng. Af aukaleikurum má nefna sterka innkomu Kára Kristinssonar í hlutverki verndarengils Frenchy þar sem hann syngur lagið Fallisti í fegrun og þá vakti Stefanía Ottesen sem Patty hrifningu og hlátur í hvert sinn sem hún kom fram.

Niðurstaðan er fjörug og skemmtileg sýning sem vafalaust á eftir að skemmta Skagamönnum og nærsveitungum næstu vikurnar miðað við fyrstu viðtökur. Einar Viðarsson leikstjóri, Flosi Einarsson tónlistarstjóri og Margrét Hörn Jóhannsdóttir sem sér um dansatriðin hafa náð að gera góða sýningu enn betri og ber að hrósa þeim og öllum sem taka þátt í sýningunni fyrir frábæra kvöldstund. Allir í Bíóhöllina og góða skemmtun.

Fréttaveita Vesturlands

Gleði og glaumur á söngleiknum Grease