Verkefnið Fjársjóðir Fellsstrandar kynnt

Staðarhaldarar á Staðarfelli á Fellsströnd í Dalasýslu fengu styrk frá Frumkvæðissjóði DalaAuðs nýverið. Þau hafa nú kynnt verkefni sitt á Facebook síðu Staðarfells og ber það heitið „Fjársjóðir Fellsstrandar.“ Markmið verkefnisins er að halda að minnsta kosti fjóra ólíka viðburði í sumar og beina sjónum að fjársjóðum Fellsstrandar í lofti, láði og legi. Fellsströnd er strandlengjan út með Hvammsfirði. Hún endar við Klofning í vestri, þar sem Skarðsströnd tekur við. Til stendur að halda reglubundna viðburði í félagsheimilinu á Staðarfelli.

Gullni söguhringurinn

Gullni söguhringurinn er leiðin frá Hvammssveit um Fellsströnd, yfir Klofning og yfir á Skarðsströnd, upp í Saurbæ. Svæðið er ekki í alfaraleið og mikilvægt er að sögn staðarhaldara á Staðarfelli að fá fólk til að fara þennan merka hring. Viðburðir geta þar skipt miklu máli í að draga fram sértæka eiginleika svæðisins; hjálpa til við að byggja upp jákvæða ímynd og auka flæði ferðafólks.

Fjölþætt menningarferðamennska

Markmið verkefnisins er að byggja upp fjölþætta menningarferðamennsku og sjálfbærni í rekstri og áformað er að vinna að því í nánu samráði og samtali við íbúa svæðisins. Dæmi um það sem á dagskrá verður er ferð í fjörumó og sjósund, kennsla og smakk á matarmenningu úr Dölum, nýsköpunar- og frumkvöðlasmiðja fyrir foreldra og börn og menningarganga um svæðið. Fram kemur í tilkynningu að reiknað er með að hver viðburður taki 3-5 klst og að áhersla sé lögð á að byggja upp og efla núverandi samfélag. Nánari upplýsingar má sjá á Facebook síðu Staðarfells og er fólk í Dölum og nærsveitum sem hefur áhuga á að taka þátt í verkefninu beðið um að hafa samband hið fyrsta við Baldur Ingvarsson á Staðarfelli um netfangið baldur@vvit.is

Fellsströndin og Gullni söguhringurinn

Verkefnið Fjársjóðir Fellsstrandar kynnt

Verkefnið Fjársjóðir Fellsstrandar kynnt