medium

large

thumbnail

small

custom-size

Frambjóðendur á ferð og flugi

Fundur haldinn vegna verkefnisins Gott að eldast

1536x1536

Sólarhylling heldri borgara

2048x2048

Ellefu gild framboð til embættis forseta Íslands

Naumt tap ÍA gegn FH í spjaldaleik

Kúalaug á Reykhólum fær myndarlegan styrk

core/paragraph

Blaðamaður Skessuhorns gerði sér ferð í Heilsu Hof á Kleppjárnsreykjum en þar er að finna fyrsta flokks líkamsræktarstöð sem íbúar Kleppjárnsreykja og nærsveita nota. Sigrún Hjartardóttir byrjaði starfsemi í febrúar 2012 og hefur verið öflug að sníða fjölbreytta dagskrá fyrir fjölbreyttan hóp íbúa uppsveita Borgarfjarðar.

&nbsp;„Ég var með íþróttaskóla hér inni til að byrja með en var ávallt að færa til tæki og tól til að koma öllum fyrir. En svo sprakk aðsóknin og nú er íþróttaskóli, einu sinni í viku í íþróttahúsinu á Kleppjárnsreykjum í samstarfi við Ungmennafélag Reykdæla. Krakkarnir og foreldrarnir eru að koma héðan úr sveitunum, frá Hvanneyri, Húsafelli og úr Þverárhlíð.“, segir Sigrún. Blaðamaður rekur augun í veggspjald við inngang líkamsræktarinnar en þar er að finna fjölbreytta dagskrá fyrir vikuna. „Við erum með Janus-heilsueflandi starfstöð hér og tökum á móti fjölda fólks tvisvar í viku en síðan hafa verið hér jógatímar sem byrja á ný í haust. Það er því mikið um að vera hér alla vikuna. Svo erum við með opið frá 7-22 á hverjum degi en fólk getur keypt sér aðgang á mismunandi vegu, til dæmis með árskorti, tíu tíma korti eða mánaðarkorti. Við treystum fólki sem kemur hér inn að það skrái sig, gangi frá eftir sig og gangi vel um.“

Sigrún segir að jógatímarnir ásamt Kraft og Þol tímum Evu Karenar eru alltaf þéttsetnir en á efri hæð líkamsræktar eru sér útbúnar dýnur sem hægt er að nota í jóga en einnig í fleiri æfingar. „Ég var að æfa aikido og var með æfingar hér áður fyrr, en nú eru að koma inn skólakrakkar að æfa til dæmis glímu og taekwondo,“ bætir Sigrún við. Líkamsræktarstöðin er hlaðin tækjum sem hafa ýmist verið fengin notuð eða keypt beint úr kassanum. „Við keyptum pakka af tækjum af Lindu P. en hún var að endurnýja líkamsræktarstöð hjá sér á sínum tíma. Svo höfum við verið að bæta við okkur tækjum jafnt og þétt, vorum að fá tvö hlaupabretti inn í stöðina og svo reynum við að fylgja straumnum. Við tökum öllum ábendingum frá iðkendum um hvað vanti, hvað má bæta og slíkt og reynum að hafa þjónustuna fyrir alla,“ segir Sigrún. Margt erlent starfsfólk fyrirtækja í uppsveitum Borgarfjarðar er duglegt að nota stöðina. „Við erum að fá fólk frá Húsafelli, Varmalandi og Reykholti hingað inn, af öllum þjóðernum og settum nýlega upp boxpúða þar sem margir aðilar voru að spyrjast fyrir um slíkan púða,“ bætir Sigrún við.

Það flæða hérna út afreksmenn

Um 300-400 heimsóknir eru á mánuði í líkamsræktarstöðina en Sigrún nefnir að mörg ungmenni sem koma heim í Borgarfjörðinn noti aðstöðu Heilsu Hofs. „Menntaskólakrakkarnir koma hingað að æfa yfir sumarið ásamt því sem þetta er nokkurskonar samkomuhús. Hér hittist fólk og ræðir málin inn á milli æfinga. Við vorum með skipulagðar æfingar fyrir slökkvilið og lögreglu Borgarbyggðar hér í stöðinni fyrir nokkru síðan og þá hittust til dæmis félagar úr héraðinu sem gátu spjallað um ýmis málefni á milli æfinga. Svo mæta ungmenni sem eru að keppa á stórmótum, en einnig eldra fólk sem er að lyfta hér og keppa á mótum erlendis; mótum sem ég hafði ekki hugmynd um,“ segir Sigrún og hlær.

Mikil umræða hefur verið í kringum Janus verkefnið en Sigrún segir að þetta verkefni sé að hjálpa mikið hjá fólki í uppsveitum Borgarfjarðar. „Við erum að sjá fólk hér inni sem hefur aldrei verið í skipulagðri líkamsrækt á sinni ævi í bland við fólk sem hefur alltaf verið viðloðandi íþróttir. Það finnst mér frábært að sjá og það er gaman að heyra hvað fólk er yfir höfuð ánægt með þetta verkefni. Eins er mikilvægt fyrir fólk á eldri árum að það sé verið í prófunum á hinum ýmsu kvillum sem geta komið upp á. Það voru einhverjir í þessu verkefni sem hafa til dæmis ekki farið undir læknishendur í meira en 30 ár. Þannig getur þetta verkefni hjálpað til ef það eru einhverjir kvillar fyrir hendi,“ bætir Sigrún við.

Eins og Sigrún greindi frá er fólk að koma úr mismunandi áttum og æviskeiðum í líkamsrækt hjá Heilsu Hofi. „Við erum hér til dæmis með einstaklinga sem hafa alla tíð verið duglegir að hreyfa sig, til dæmis með því að ganga á fjöll og svo framvegis. En einnig einstaklinga sem eru nýbyrjaðir, hafa aldrei stigið inn í líkamsræktarstöð eða stundað skipulega líkamsrækt. En þeir gefa þeim reynslumeiri ekkert eftir í æfingum, sem er gríðarlega skemmtilegt að horfa á og upplifa,“ segir Sigrún í lokin.

Fréttaveita Vesturlands

Mikilvæg lífæð fyrir fólkið hér á svæðinu