Annar leikur undanúrslitaviðureignar Snæfells og Tindastóls í körfuknattleik kvenna fór fram í gærkvöldi á Sauðárkróki. Um er að ræða umspilsleiki um sæti í Subwaydeild kvenna á næsta tímabili. Fyrsti leikur liðanna var á mánudaginn síðastliðinn og fór Tindastóll þá með sigur af hólmi en leikið var í Stykkishólmi.

Leikurinn í Síkinu hófst með mikilli baráttu í bland við tapaða bolta. Lítið var skorað fyrstu þrjár mínútur leiksins en Mammusu Secka kom Snæfelli loks á blað þegar hún skoraði þriggja stiga körfu og staðan þá 5-3, Tindastól í vil. Áfram hélt baráttan, Shawnta Shaw skoraði aðra þriggja stiga körfu og jafnræði með liðunum. Þegar um fimm mínútur lifðu af fyrsta leikhluta var staðan 11-6 fyrir Tindastól en þá fór allt í baklás hjá Snæfelli. Ekkert gekk upp hjá liðinu síðustu fimm mínútur fyrsta leikhlutans og náði Tindastóll 13-2 áhlaupi til að klára leikhlutann. Staðan því 24-8 fyrir Tindastól eftir fyrsta leikhluta.

Snæfell skoraði fyrstu fimm stig annars leikhluta og það var greinilegt að Baldur Þorleifsson hafði farið vel yfir hlutina á milli leikhluta. Snæfell náði upp stemningu, Dagný Inga Magnúsdóttir minnkaði muninn í 28-21 og Mammusu Secka minnkaði svo enn muninn í 30-26 þegar fimm mínútur lifðu af fyrri hálfleik. Í stöðunni 31-28 fyrir Tindastól kom aftur slæmur kafli hjá Snæfelli. Tindastóll var komið með skotrétt á vítalínu og náðu þær að enda fyrri hálfleik á 13-2 kafla þar sem Snæfell gerði sig sekan um mörg mistök ásamt því að setja leikmenn Tindastóls mikið á vítalínuna. Staðan því í hálfleik, 44-30, Tindastól í vil.

Snæfell átti erfitt með að skora í byrjun seinni hálfleiks en einnig var eins og leikmenn Snæfells væru hræddir við að fá á sig villu. Þegar fimm mínútur voru liðnar af seinni hálfleik var staðan 51-32 Tindastól í vil og síðustu mínútur þriðja leikhlutans einkenndust af mikilli baráttu beggja liða en Tindastóll leiddi fyrir fjórða og síðasta leikhlutann, 61-42.

Munurinn hélst svo í fimmtán til tuttugu stigum á milli liðanna og náði Snæfell að minnka muninn í 70-57 þegar um þrjár mínútur voru eftir en Tindastóll kláraði leikinn með öruggum sigri. Lokatölur urðu 75-60 og eru Stólarnir því komnir með tvo sigra en fyrsta liðið til að vinna þrjá leiki fer í úrslit um sæti í Subwaydeild kvenna.Í hinu umspilseinvíginu vann KR nauman sigur á liði Aþenu, 76-75, og er staðan þar jöfn, 1-1.

Í samtali við karfan.is var Baldur Þorleifsson þjálfari Snæfells vonsvikinn eftir leik. „Eins og þetta lítur út núna er eins og liðið sé búið að gefast upp. En ég gefst aldrei upp sjálfur og þarf ég að koma því hugarfari inn í leikmenn. Ef við náum því þá getum við unnið næsta leik en þá er spurning hvort að liðið nenni framhaldinu,“ sagði Baldur í viðtali við karfan.is.

Stigahæstar í liði Snæfells voru Shawnta Shaw með 24 stig og þær Eva Rupnik og Mammusu Secka voru með 10 stig hvor. Hjá Tindastól var Ifunanya Okoro stigahæst með 17 stig og þær Klara Sólveig Björgvinsdóttir og Rannveig Guðmundsdóttir skoruðu 14 stig hvor.

Næsti leikur í einvíginu verður í Stykkishólmi, sunnudaginn 14. apríl og hefst hann klukkan 19.15.

hig

Snæfell tapaði í Síkinu