medium

large

thumbnail

1536x1536

2048x2048

small

custom-size

Byrjaði á beitningu í landi en stundar nú sjóinn

Engin lognmolla hjá Siggu Lóu

Aðalsteinn settur í embætti ráðuneytisstjóra

Diskóeyjan sýnd í Bíóhöllinni um miðjan maí

„Við eigum klárlega heima í Lengjudeildinni“

Til hamingju með daginn!

core/paragraph

Rætt við Jón Þór Hauksson þjálfara ÍA um komandi tímabil

Skagamenn léku í Lengjudeildinni á síðasta tímabili og komust upp í efstu deild, Bestu deildina, með því að enda í efsta sæti með 48 stig eftir 22 leiki og ásamt þeim fór Vestri upp eftir sigur á Aftureldingu í umspili í lok september. Síðast var ÍA í næst efstu deild árið 2018 þegar Jóhannes Karl Guðjónsson kom þeim á meðal þeirra bestu og ánægjulegt að í ár eru Skagamenn komnir á þann stað sem þeir vilja vera. Jón Þór Hauksson er að þjálfa lið ÍA þriðja árið í röð og blaðamaður Skessuhorns kom við hjá honum í síðustu viku til að ræða tímabilið sem hófst um síðustu helgi.

Hvernig gekk undirbúningstímabilið? „Það gekk virkilega vel frá fyrsta degi. Við erum nýliðar í deildinni og kláruðum snemma okkar keppnistímabil síðasta haust. Við unnum Lengjudeildina þannig að við sluppum við úrslitakeppnina og gátum tekið gott frí eftir að deildinni lauk. Við byrjuðum fyrr en flest liðin í Bestu deildinni, við byrjuðum í lok október og æfðum vel fram að jólum. Við notuðum veturinn til að skerpa aðeins á okkar leik, breyttum um leikaðferð og þetta hefur bara gengið vel. Úrslitin hafa verið nokkuð góð, við fengum þann liðsstyrk sem við ætluðum okkur að fá&nbsp; og ég er mjög ánægður hvernig nýju leikmennirnir hafa komið inn í okkar hóp.“

Margir nýir leikmenn

Jón Þór segir að kannski hafi aðeins of miklar breytingar orðið á leikmannahópnum frá síðasta tímabili og örlítið meiri en þeir áttu von á. „Það voru gerðar miklar breytingar á hópnum á mínu fyrsta ári, það voru margir leikmenn sem fóru þá og við fengum nokkra uppalda Skagamenn í staðinn. Leynt og ljóst höfum við reynt að byggja upp Skagalið sem er byggt upp á kjarna af heimamönnum og það hefur gengið mjög vel. Við misstum reyndar Daniel Inga Jóhannesson og Hauk Andra Haraldsson út í atvinnumennsku síðasta sumar og síðan einnig þá Gísla Laxdal, Hákon Inga Einarsson og Indriða Áka Þorláksson eftir tímabilið. Í staðinn hafa komið þeir Oliver Stefánsson, Marko Vardic, Hinrik Harðarson, Guðfinnur Þór Leósson, Erik Tobias Sandberg og Ísak Máni Guðjónsson. Ég vona eftir þetta tímabil að við séum farnir að sigla lygnan sjó í þessum leikmannamálum og við séum komnir nokkurn veginn á þann stað sem við viljum vera og breytingarnar verði minni og minni milli ára.“

Nú ert þú kominn með Dean Martin sem aðstoðarþjálfara. Hvernig hefur hann komið inn í þetta? „Hann hefur komið mjög sterkur inn, ég er búinn að þekkja Deano síðan hann kom fyrst hérna sem leikmaður árið 1998 og við þjálfuðum mikið saman áður fyrr hjá ÍA. Deano kemur inn sem styrktarþjálfari líka og hefur mikil og góð áhrif á hópinn, ekki bara á hann heldur félagið allt í heild sinni. Það er mikil og jákvæð orka sem fylgir honum, hann er reynslumikill og fær þjálfari og við erum bara mjög heppnir að hafa fengið hann aftur til okkar. Við höfum verið að æfa mjög mikið á köflum í vetur og þyngra en undanfarin ár og þar er Deano á heimavelli í þeim málum.“

Þið hafið náð ágætis úrslitum undanfarið í Lengjubikarnum þar sem þið komust í úrslit. Þessi úrslit hljóta að hjálpa liðinu fyrir komandi verkefni? „Ég hef trú á því að þau hjálpi alltaf, það er aldrei slæmt að vinna leiki og það hjálpar í undirbúningi fyrir mót að ganga vel. Undirbúningstímabilið er auðvitað næstum það lengsta í heimi, góð úrslit stytta stundirnar fram að móti og hlýja yfir köldustu vetrarmánuðina. Fyrir liðið að ná góðum úrslitum yfir veturinn er mikilvægt og hvað sem hver segir um það þá tel ég alltaf að það skipti máli.“

Deildin verði jafnari en undanfarin ár

Þið eruð nýliðar í Bestu deildinni á þessu tímabili. Hvernig líst þér á hana? „Ég held hún verði stórskemmtileg á að horfa og fyrir utanaðkomandi aðila verði þetta mjög spennandi og skemmtileg deild. Eins og flestir fótboltaáhugamenn vita þá eru komnir margir gæðaleikmenn til baka úr atvinnumennsku, bæði eftir langan feril og einnig ungir strákar sem eru komnir heim. Þannig að liðin mæta mjög sterk til leiks og ég held að deildin verði jafnari en undanfarin ár beggja vegna á töflunni.“

En hvert er markmiðið fyrir mót? „Mitt persónulega markmið sem þjálfari liðsins er að ná stöðugleika í félagi sem hefur verið leita að honum á þessari öld í raun. Við erum nýliðar í deildinni og í sögulegu samhengi höfum við alltaf komið upp með látum, innan gæsalappa sem spútniklið oft á tíðum, en síðan hefur farið að halla undan fæti. Til lengri tíma litið þá snúast mín markmið og minn metnaður fyrir því að ná stöðugleika í árangri og í leikmannamálum. Markmiðið er að byggja upp öflugt og gott Skagalið þar sem liðsheild, samheldni og samkennd innan liðsins einkennir það. Ég tel okkur á mjög góðri leið með það og síðustu tvö ár hafa gengið mjög vel hvað þetta varðar. Þannig að mitt markmið í sumar snýr að því að við sjáum þannig Skagalið í deildinni. Ég trúi því að árangurinn komi með því og ef það næst að þá fylgi hann í kjölfarið. Sagan segir okkur það að þegar ÍA hefur teflt fram þannig liðum þá hefur gengið best þannig.“

ÍA varð bikarmeistari árið 2003 og hefur síðan þá ekki unnið titil eða í meira en 20 ár. Er ekki kominn tími á að ná einum titli í hús? „Það er auðvitað löngu orðið tímabært, eins og ég sagði áður þá tel ég að árangur fylgi í kjölfarið ef þú vinnur hlutina vel og á réttan hátt. Þegar ég tala um á réttan hátt þá meina ég að liðið sé byggt upp þannig og undirbúið á réttan hátt og þá fylgir árangur í kjölfarið. Við erum búnir að leggja gríðarlega hart að okkur í vetur, bæði leikmenn og þeir sem í kringum liðið eru. Við verðum svo bara að sjá hvað kemur út úr því í sumar en við erum alla vega tilbúnir í að byrja þetta mót.“

En hvernig fótbolta ætla Skagamenn að spila í sumar? „Það er ekkert launungarmál að við viljum og aftur tala ég í sögulegu samhengi um að stóra markmiðið er að bæta varnarleik liðsins. Við höfum verið að fá allt of mörg mörk á okkur síðustu ár í efstu deild og verðum að ná meiri stöðugleika í okkar varnarleik. Þeir leikmenn sem við fengum til félagsins núna milli tímabila eru komnir til að efla varnarframmistöðu liðsins þannig að það er verkefni númer eitt. Síðan höfum við á að skipa gæðamiklum leikmönnum með boltann einnig og ég held að það sé ekkert sem stendur í vegi fyrir því að við spilum skemmtilegan sóknarbolta þegar það á við. Aðal málið er að hafa góða blöndu til að blanda þessum tveimur þáttum vel saman og til að árangur náist þarf þetta tvennt að virka vel, leiftrandi sóknarleikur og agaður og skipulagður varnarleikur.“

Allt erfiðir leikir

Spurður um hvort einhverjir leikmenn séu á meiðslalistanum svona rétt fyrir mót segir Jón Þór að Ármann Ingi Finnbogason sé sá eini sem eigi við meiðsli að stríða. Hann meiddist í æfingaferðinni á Spáni aftan í læri og það séu einhverjar vikur í hann en hann er sá eini á meiðslalistanum eins og er. Fyrstu fimm leikirnir í mótinu eru leikir á móti Val, HK, Fylki, FH og Stjörnunni. Hvernig líst þér á þessa byrjun? „Mér líst bara vel á hana, það er frábært fyrir okkur að spila fyrsta leik á Hlíðarenda og miklar væntingar gerðar þar, sérstaklega með komu Gylfa Sigurðssonar. Það hentar okkur vel, við spiluðum undanúrslitaleik í Lengjubikarnum við Val fyrir skömmu og áttum virkilega öflugan leik þar. Það er spennandi og krefjandi verkefni að byrja mótið þar og það er tilhlökkun í mannskapnum fyrir þessum leik og tímabilinu öllu. En byrjunin á mótinu er auðvitað strembin. Það er sama hvernig leikjaniðurröðunin hefði orðið, þetta eru allt erfiðir leikir og mörg lið sem hafa styrkt sig mikið þannig að ég held það skipti ekki höfuðmáli hvenær við mætum þeim. Þetta eru allt krefjandi og erfið verkefni.“

En hvað viltu fá mörg stig úr fyrstu fimm leikjunum? „Fimmtán,“ segir Jón Þór og glottir. „Við tökum bara einn leik í einu og ætlum okkur að fara á Hlíðarenda og vinna leikinn. Það er ekkert öðruvísi með hina fjóra, við ætlum okkur að fara í alla leiki í sumar til þess að vinna þá. Við erum búnir að leggja mjög hart að okkur til þess að koma okkur í stöðu til að geta gert það og það eru auðvitað væntingarnar sem við höfum til hvers og eins leiks. Það verður svo að koma í ljós hvað þetta skilar okkur og það á auðvitað ýmislegt eftir að ganga á. Við þekkjum það að þegar mótið fer í gang þá þarftu líka að vera í stakk búinn til þess að bregðast við mismunandi aðstæðum og áföllum. Ég tel okkur hafa leikmannahóp til þess en svo verðum við bara að sjá hvernig sumarið þróast. Ég held að veturinn hafi sýnt okkur það að við getum horft í augun á öllum okkar andstæðingum og farið á fulla ferð í þá leiki sem eru framundan en síðan verðum við bara að sjá hvað það skilar okkur.“&nbsp;&nbsp; &nbsp;&nbsp;&nbsp;

Eitthvað að lokum? „Vonandi fáum við góðan stuðning í sumar og ég tel að strákarnir eigi það skilið. Það er gríðarlega góður andi og stemning í hópnum okkar og ég vona að það smitist í bæjarfélagið og fólkið á Akranesi styðji við bakið á liðinu.“

core/image

Nýir leikmenn í herbúðum ÍA 2024. Fyrir framan eru Hinrik og Guðfinnur Þór og bak við þá eru Erik Tobias, Marko og Oliver. Ísak Máni var á æfingu með 2. flokki ÍA.

Fréttaveita Vesturlands

Gríðarlega góður andi og stemning í hópnum