Fullt af leikjum fóru fram í fyrstu umferð Mjólkurbikars karla í knattspyrnu um helgina og þrjú lið af af Vesturlandi voru í eldlínunni. Kári komst í aðra umferð en Skallagrímur og Reynir Hellissandi eru úr leik þetta árið.

Káramenn sem leika í 3. deild fóru létt með fimmtu deildar lið Uppsveita í Akraneshöllinni á laugardaginn. Oskar Wasilewski skoraði fyrsta mark leiksins strax á fimmtu mínútu og eftir hálftíma leik skoraði Hektor Bergmann Garðarsson annað mark Kára úr vítaspyrnu. Hektor var síðan aftur á ferðinni rétt fyrir hálfleik og staðan 3-0.

Fyrirliðinn Sigurjón Logi Bergþórsson kom sínum mönnum í fjögurra marka forystu í byrjun seinni hálfleiks og það var síðan Mikael Hrafn Helgason sem skoraði síðasta mark Kára í leiknum, lokatölur 5-0 og Káramenn komnir örugglega áfram í næstu umferð. Þar mæta þeir 2. deildar liði Selfoss sem sat hjá í fyrstu umferðinni. Viðureignin verður næsta föstudag á Jáverk-vellinum á Selfossi og hefst klukkan 19.15.

Skallagrímur sem leikur í fjórðu deild í sumar tók á móti 2. deildar liði Ægis í Akraneshöllinni á laugardagskvöldið. Ólafur Bjarki Stefánsson kom Sköllunum óvænt yfir á 10. mínútu en tíu mínútum síðar jafnaði Anton Breki Viktorsson metin fyrir gestina. Skömmu fyrir hálfleik skoraði Brynjólfur Þór Eyþórsson annað mark Ægis og staðan 1-2.

Skagamaðurinn Sigurður Hrannar Þorsteinsson gulltryggði síðan sigur gestanna með marki á 78. mínútu og fimm mínútum fyrir leikslok fékk Atli Rafn Guðbjartsson leikmaður Ægis rautt spjald en það breytti litlu og lokatölur 1-3 fyrir Ægi.

Fimmtu deildar lið Reynis Hellissands spilaði við Árborg sem spilar deild ofar á laugardaginn og var leikurinn á Jáverk-vellinum á Selfossi. Heimamenn í Árborg voru fjórum mörkum yfir í hálfleik og bættu við tveimur mörkum fljótlega í seinni hálfleik. Á síðasta korteri leiksins opnuðust allar flóðgáttir hjá Reyni og Árborg skoraði sex mörk á lokakaflanum, lokatölur 12-0 fyrir Árborg.

Kári vann stórsigur á Uppsveitum í Mjólkurbikarnum