Fjölnir og ÍA áttust við í fyrstu umferð úrslitakeppni fyrstu deildar karla í körfuknattleik í gærkvöldi og fór leikurinn fram í Dalhúsum í Grafarvogi. Um var að ræða leik í 8-liða úrslitum og það lið sem mun standa eitt eftir fær sæti í Subway deildinni á næstu leiktíð. Töluverður munur hefur verið á liðum Fjölnis og ÍA í vetur. Fjölnir var í toppbaráttu og endaði í þriðja sæti með 36 stig á meðan ÍA lauk leik í deildinni í 8. sæti með 20 stig. Í þessu einvígi skiptir það litlu máli því framundan er mikil barátta á milli liðanna um að ná þremur sigrum til að komast í undanúrslit.