Í gær var undirritaður samningur á milli Borgarbyggðar og byggingaverktakans Sjamma ehf um niðurrif og nýbyggingu við Grunnskóla Borgarfjarðar á Kleppjárnsreykjum í Reykholtsdal. Nú þegar eru 15 gámar sem nýttir verða undir kennslu og salernisaðstöðu komnir á byggingarsvæðið. Vinna hefst strax á morgun, fimmtudag, við það að girða af fyrirhugað framkvæmdasvæði og undirbúa jarðvegsvinnu. Í samtali við blaðamann Skessuhorns nefndi Orri Jónsson, svæðisstjóri Eflu á Vesturlandi að vonir séu bundnar við að hefja niðurrif á skólanum um 15. apríl.