Í morgun hefur orðið vart við reyk á Grundartangasvæðinu og stafar hann frá starfssvæði álvinnslunnar Als. Skessuhorn hafði samband við Brynju Silness forstjóra fyrirtækisins sem segir að veðurbreytingar hafi komið af stað virkni í efni, sem rýkur úr. Þetta sé hlutleyst efni og hættulaust. Starfsmenn fyrirtækisins hafi strax brugðist við og virkjað viðbragðsáætlun sem felur í sér að flokka niður efnið og stöðva virknina. Þetta hefur gengið vel og um tíuleytið var verkinu að mestu lokið. Í framhaldi verður farið í ráðstafanir á geymslu efnis til að koma í veg fyrir að slíkt endurtaki sig.

Alur álvinnsla hefur verið með starfsemi á Grundartanga frá árinu 2012, en fyrirtækið var stofnað í Helguvík árið 1998. Á heimasíðu fyrirtækisins kemur fram að það endurvinnur álgjall sem fellur til við frumframleiðslu áls hjá álfyrirtækjum í landinu, en einnig er ál endurunnið úr öðrum álríkum efnum. Árið 2022 voru framleidd um fjögur þúsund tonn af áli úr sjö þúsund tonnum af álgjalli en fyrirtækið hefur starfsleyfi til þess að taka á móti allt að fimmtán þúsund tonnum árlega. Alur er eina verksmiðjan á Íslandi sem endurvinnur álgjall.

gj/ljósm hig

Efnisleki hjá Al á Grundartanga – ekki mengunarhætta