Páskaeggjaframleiðandinn Nói Síríus hefur tekið tekið þá ákvörðun að selja öll páskaegg sem verða enn eftir í verslunum um allt land nú eftir páska með 50% afslætti. Tilboðin hefjast í dag í þeim verslunum sem eru opnar og gilda meðan birgðir endast. Auðjón Guðmundsson, framkvæmdastjóri markaðs- og sölusviðs hjá Nóa Síríus, segir að vanalega endurvinni fyrirtækið páskaeggin sem ekki seljast, þau séu nýtt í aðrar vörur, gefin til góðgerðarstofnana eða seld til aðila í útlöndum.

„Í fyrra vorum við með lagersölu á óseldum páskaeggjum í byrjun maí og þar seldist allt upp. Í ár tókum við þá ákvörðun að spara okkur sporin og kolefnissporin í leiðinni og bíða aðeins með að taka páskaeggin úr búðunum. Við vonumst til að allt klárist þannig að við sleppum við allan flutning fram og til baka, það væri kjörstaðan. Því ætlum við að vera með 50% afslátt af okkar páskaeggjum og jafnvel bæta við afslættinn þegar líður á vikuna,“ segir Auðjón.

Auðjón segir að útsalan á páskaeggjunum hefjist í dag og vonast til að allt seljist upp, en annars út vikuna ef þarf. „Þetta er okkar innlegg í kjarabaráttuna í landinu en auðvitað er þetta aðallega gert til að gleðja okkar viðskiptavini sem elska súkkulaði jafn mikið og við,“ segir Auðjón að lokum.