medium

large

thumbnail

1536x1536

2048x2048

small

custom-size

Halló-Ringó ´24 á Akureyri

Afhentu bæjarstjóra undirskriftalista

Menningarferð FaB um Lundarreykjadal

Valentin vann gull á Mjölni Open fimmta árið í röð

Fjölgað í húsvarðateymi sveitarfélagsins

Ólafsvíkurvöllur og Skallagrímsvöllur á lista topp tíu valla landsins

core/paragraph

Meirihluti byggðarráðs Borgarbyggðar samþykkti á fundi sínum 21. mars síðastliðinn að kennslu barna í 5.-10. bekk Grunnskóla Borgarfjarðar á Varmalandi verði hætt frá og með næsta hausti. Minnihluti í sveitarstjórn leggst gegn því að miðstig skólans verði lagt niður og kennslu barna sinnt í Borgarnesi og á Kleppjárnsreykjum. Bæði meiri- og minnihluti byggðarráð lögðu fram bókun um málið, en fram hefur komið að ekki er einhugur um þessa ákvörðun og raunar hörð andstaða í röðum heimafólks. Í bókun meirihluta Framsóknarflokks í byggðarráði segir: „Byggðarráð telur að með því að bjóða börnum bæði af miðstigi og elsta stigi GBF á Varmalandi upp á nám í fjölmennari skólum eða deildum í sveitarfélaginu megi betur mæta þeim kröfum sem gerðar eru í skólastarfi samkvæmt aðalnámsskrá. Byggðarráð tekur að því leyti undir sjónarmið sem fram koma í afgreiðslu fræðslunefndar. Frá því halla fór undan fæti með staðnám við Háskólann á Bifröst hefur nemendum fækkað nær samfellt við Varmalandsdeild og fjölgun við deildina síðustu tvö ár er eingöngu vegna verkefnis um móttöku flóttamanna.“

Þá segir í bókun meirihlutans að framtíð skólastarfs við Varmalandsdeild hafi stöðugt verið til umræðu síðustu ár. „Það hefur leitt til langvarandi óvissu fyrir börn, foreldra og starfsfólk. Kallað hefur verið eftir framtíðarsýn sveitarfélagsins um skólahald á Varmalandi og að óvissunni verði eytt. Með þessari ákvörðun telur byggðarráð að því ákalli sé mætt.

Kostnaðarmat gefur til kynna að fjárhagsleg áhrif af því að leggja niður bekkjardeildir á miðstigi og elsta stigi á Varmalandi verði jákvæð um 60 - 70 milljónir króna fyrir rekstur Borgarbyggðar þegar full áhrif breytinganna verða komin fram að tveimur til þremur árum liðnum. Þeim mun fylgja tímabundinn kostnaður og fjárfesting í húsnæði á Varmalandi. Ekki er ráðgert að ráðast í neinar uppsagnir starfsfólks.“

Meirihluti byggðarráðs fól sveitarstjóra að halda áfram að útfæra hugmyndir um breytt fyrirkomulag skólaaksturs m.t.t. fækkunar bekkjardeilda á Varmalandi og samsvarandi fjölgunar í öðrum deildum eða skólum í sveitarfélaginu. Byggðarráð óskar eftir því að þær hugmyndir verði tilbúnar áður en kemur að fullnaðarafgreiðslu málsins á fundi sveitarstjórnar sem dagsettur er 11. apríl næstkomandi. Í sumar verður unnið að endurbótum á húsnæði GBF á Varmalandi en ráðgert er að leikskólinn Hraunborg flytji starfsemi sína í húsnæðið í haust. Unnið er út frá því að um 20 - 30 börn verði í leikskólanum Hraunborg að Varmalandi. Afgreiðslunni málsins var eins og fyrr segir vísað til fullnaðarafgreiðslu í sveitarstjórn. Fulltrúar meirihlutans í byggðarráði, sem greiddu atkvæði með tillögunni, voru Guðveig Eyglóardóttir og Davíð Sigurðsson.

Tekið fram fyrir hendur fræðslunefndar

Sigurður Guðmundsson (D) er fulltrúi minnihlutans í byggðarráði, en áheyrnarfulltrúar í ráðinu eru Thelma Harðardóttir og Bjarney Bjarnadóttir. Minnihlutinn bókaði:  „Minnihlutinn harmar þá ákvörðun meirihluta byggðaráðs Borgarbyggðar að taka fram fyrir hendur fræðslunefndar og ákveða flutning miðstigs Varmalandsdeildar Grunnskóla Borgarfjarðar í aðra skóla. Samkvæmt bókun fræðslunefndar var niðurstaða hennar að flytja 8. - 10. bekk að Kleppjárnsreykjum og að halda fund með foreldrum áður en ákvörðun um flutning á miðstigi yrði tekin. Sá fundur er búinn en fræðslunefnd hefur ekki fundað til að taka ákvörðun í þessu máli. Það er mat minnihlutans að með þessari afgreiðslu sé meirihluti byggðarráðs að taka fram fyrir hendurnar á fræðslunefnd og þessi afgreiðsla verður því að teljast óvönduð stjórnsýsla svo ekki sé dýpra í árina tekið.“

Fréttaveita Vesturlands

Einungis yngsta stigi grunnskóla verður kennt á Varmalandi