Í Brekkubæjarskóla á Akranesi er í gangi skemmtilegt verkefni sem heitir Draumaskólinn minn. Þar gefst nemendum tækifæri til að koma hugmyndum sínum um skólastarfið á framfæri. Börnin eru hvött til að hugsa um hvað gæti bætt skólann og fært hann nær draumaskólanum þeirra.

Eiga góða stund saman

Síðasta vor, í Draumaskólavinnunni, fengu þrjár stúlkur á miðstigi þá hugmynd að stofna bókaklúbba. Þar myndu áhugasamir nemendur skrá sig í klúbba og lesa sömu bókina undir stjórn skólasafnskennara. Stúlkurnar heita Helen Amalía Guðjónsdóttir, Karen Anna Orlita og Vilborg Anna Björgvinsdóttir og eru í 6. bekk. Blaðamaður hitti á þær í skólanum á dögunum og spurði þær hvernig þessi hugmynd hefði kviknað?

„Okkur finnst gaman að lesa, gaman að tala um bækur og gaman að kynnast nýju fólki,“ segja þær. Vilborg segir að hún lesi að minnsta kosti þrettán bækur á mánuði og les yfirleitt hverja bók á 2-3 dögum. Þær segjast allar vera mjög góðar í lestri og stefna á að taka þátt í upplestrarkeppninni á næsta ári. Stúlkurnar segja að það sé mjög gaman að vera í bókaklúbbi og það sé alltaf að bætast í hann. Meðlimir hittast alltaf einu sinni í viku, á þriðjudögum, í tæpa klukkustund og eiga góða stund saman. Spurðar um hverjar séu uppáhaldsbækurnar þeirra segja þær að ævintýrabækur eins og sögurnar um Harry Potter séu mjög skemmtilegar og Vilborg nefnir að hún lesi einnig þjóðsögur, rómantískar sögur og hryllingssögur.

Stúlkurnar kynntu hugmyndina fyrir stjórnendum skólans og Jónellu Sigurjónsdóttur, skólasafnskennara. Hún kynnti síðan hugmyndina á fundi með miðstigskennurum og fékk hugmyndin alls staðar góðan hljómgrunn. Að lokum fóru þessar þrjár stúlkur í alla bekki á miðstigi og kynntu bókaklúbbinn fyrir samnemendum sínum. Fram kemur á FB síðu Skólasafns Brekkubæjarskóla að ákveðið var að fara af stað með einn klúbb fyrir miðstig sem myndi hittast vikulega. Skráningin var mjög góð og í janúar mættu níu nemendur á fyrsta fund klúbbsins. Ákveðið var að fyrsta bókin yrði Rökkurhæðir – Rústirnar. Meðlimir klúbbsins lásu bókina á þremur vikum og fengu vikulega tíma til að ræða framvindu sögunnar.

Eftir þetta hafa meðlimir í bókaklúbbnum lesið Georg og magnaða mixtúran eftir Roald Dahl og Verstu-bækurnar eftir David Walliams. Klúbburinn er í sífelldri þróun og með síðustu bókinni fengu meðlimir bókamerki með upplýsingum um hvað átti að lesa mikið í hverri viku og hugmyndir að vangaveltum um sögurnar.

Klúbburinn lifir enn góðu lífi núna í mars. Fjöldinn hefur vaxið og eru núna um 15 meðlimir. Félagsmenn eru farnir að taka meiri ábyrgð á fundum og fá að bjóða sig fram sem hópstjóra í umræðum. „Þetta var frábær hugmynd hjá þessum þremur miðstigsstúlkum og gaman fyrir þær, og okkur starfsfólkið í skólanum, að sjá hana verða að veruleika,“ segir í frétt skólasafnsins.

Stofnuðu bókaklúbb í Brekkó