Ný íbúakönnun landshlutanna er nú í vinnslu en síðasta könnun var gerð árið 2020 og var niðurstaðan gefin út ári síðar. Í fyrri könnun var ánægja með vegakerfið á landinu öllu og sama mátti segja um heilbrigðisþjónustu en dregið hafði úr ánægjunni á vinnumarkaði og ánægju með ýmsa afþreyingu. Talið var að rekja mætti þá þróun til Covid-19 og fækkunar ferðamanna.

Vífill Karlsson, hagfræðingur hjá Samtökum Sveitarfélaga á Vesturlandi, hefur yfirumsjón með skipulagi og framkvæmd könnunarinnar sem byggir á samstarfi SSV, Byggðastofnunar og allra annarra landshlutasamtaka utan höfuðborgarsvæðisins. „Við eigum eftir að sjá ýmsar breytingar frá síðustu könnun. Þar vorum við í miðju Covid tímabili og landslagið hér hefur breyst mikið á þessum tíma,“ segir Vífill í samtali við Skessuhorn. Markmið með gerð könnunarinnar er að meta hversu ánægðir íbúar landsins eru, hvort að íbúar flytji þaðan sem þeir búa og hver staða íbúanna er á vinnumarkaði. „Þetta er mikilvæg könnun fyrir sveitarfélögin, þar sem þau geta rýnt í styrkleika og veikleika sína, og út frá því hvaða aðgerðir séu líklegastar til árangurs í hverju sveitarfélagi fyrir sig. Þetta er líka hluti af hagsmunabaráttu sveitarfélaga gagnvart ríkinu eða einkaaðilum, byggð á aðferðafræðilega traustum gögnum um mat íbúanna á mörgum þáttum eins og til dæmis gæðum verslunar og þjónustu,“ segir Vífill.

Nú þegar hafa borist átta þúsund svör sem gefa góðar vísbendingar um afstöðu almennings til þess sem spurt er um en Vífill á von á fleirum. „Við teljum að þátttakendur verði yfir tíu þúsund þegar könnuninni lýkur og þá getum við búið til góða mynd úr henni. Samstarf Byggðastofnunar, SSV og annarra landshlutasamtaka utan höfuðborgarsvæðisins er gríðarlega gott og er mjög mikilvægt að halda því góða samstarfi áfram,“ segir Vífill að lokum. Niðurstöður könnunarinnar verða kynntar í júní á þessu ári.

Íbúakönnun landshlutanna í vinnslu