“Þið eigið leik ágætu alþingismenn!”

Sveitarstjórn Dalabyggðar samþykkti samhljóða á fundi sínum á þriðjudaginn ályktun um vegamál. Vísar sveitarstjórn til fréttar á vef Vegagerðarinnar 9. mars sl. þar sem tilkynnt var um varasamt ástand vega í Reykhólasveit og Dölum og að vegna þess hafi þurft að breyta nokkrum köflum í malarvegi fram á sumar. Ástæðan var sögð lélegt slitlag og að burðarlag hafi gefið sig sem skapi mjög hættulegar aðstæður fyrir ökumenn. Langir kaflar á Vestfjarðavegi eru metnir það slæmir að ekki er hægt að halda þeim við. Veðuraðstæður koma í veg fyrir að hægt sé að leggja klæðningu á veginn og því verða þessir ákveðnu hlutar vegarins malarkaflar fram á sumar.

Í ályktun sveitarstjórnar segir: „Það má með sanni segja að það ríki neyðarástand í vegamálum í Dalabyggð. Staðan er þannig að það er sama í hvaða átt ekið er út úr Búðardal þessa dagana, að það er ófremdarástand á nánast öllum leiðum. Okkur í Dalabyggð hefur orðið tíðrætt um Skógarströnd og Laxárdalsheiði og einnig vakið athygli á viðhaldsþörf á þjóðvegi 60 en nú er það hann, þjóðvegur 60 Vestfjarðarvegur, sem er í raun hruninn sem er ógnvænleg staða því þessi vegur, þessi leið, er í raun lífæð til okkar inn í Dali, inn á Vestfirði og Strandir.“

Þá segir að það sé mat sveitarstjórnar að nú þurfi að vinna markvisst af hálfu vegamálayfirvalda og ekki duga einhverjir „plástrar“ til að redda málum, það er neyðarástand og við því þurfi að bregðast. „Rétt er einnig að nefna, að fenginni reynslu og eftir samskipti undanfarið, að þessi staða má alls ekki verða til þess að aðrar nauðsynlegar viðhaldsframkvæmdir frestist vegna þess að áætlaðir fjármunir í þau færist í þjóðveg 60. Þetta má ekki verða annað en sérstakt átaksverkefni, umferð um þjóðveg 60 er alltaf að aukast og auk heimafólks og ferðamanna þá er þessi vegur afar dýrmæt lífæð fyrir verðmætan flutning afurða af Vestfjörðum.“

Sveitarstjórn Dalabyggðar minnir einnig á skýrslu með tillögum að forgangsröðun vegaframkvæmda í Dalabyggð sem atvinnumálanefnd Dalabyggðar vann á árinu 2023 og sveitarstjórn Dalabyggðar staðfesti í kjölfarið. „Að endingu skorum við á alþingismenn kjördæmisins alla að leggjast með okkur á árarnar. Það er óásættanlegt að m.v. fyrirliggjandi drög að samgönguáætlun sé jafn lágu fjármagni skammtað inn á Vesturland og raun ber vitni. Þið eigið leik ágætu alþingismenn og nú er tækifæri til að sanna mikilvægi þess að landsbyggðarkjördæmi eigi öfluga talsmenn við það borð sem um ræðir!“

Neyðarástand þegar lífæðin hrynur

"Þið eigið leik ágætu alþingismenn!"

"Þið eigið leik ágætu alþingismenn!"