Í október á síðasta ári var undirritaður samstarfssamningur á milli Borgarbyggðar og Janusar heilsueflingar. Verkefnið var síðan kynnt í nóvember og nú í byrjun árs fór verkefnið af stað. Markmið Janusar heilsueflingar er að bæta heilsutengdar forvarnir, efla hreyfifærni, bæta styrk og þol, auka líkamlega afkastagetu og bæta heilsu og lífsgæði. Kristrún Kúld Heimisdóttir stýrir verkefninu fyrir Borgarbyggð og segir hún að fjöldi þátttakenda hafi farið fram úr björtustu vonum. „Það eru nú skráðir 95 þátttakendur; 26 á Kleppjárnsreykjum og 69 hér í Borgarnesi og þetta hefur spurst vel út, þá sérstaklega í sveitunum. Það eru einstaklingar að mæta sem hafa lítið sem ekkert stundað markvissa styrktarþjálfun áður og margir hafa hreinlega aldrei komið inn í líkamsræktarsal áður, en eru nú komnir í skipulagða þjálfun,“ segir Kristrún þegar blaðamaður Skessuhorns nær henni í spjall eftir þolæfingu í kjallara Hjálmakletts í Borgarnesi. „Við erum með aðstöðu hér í Hjálmakletti til þolþjálfunar sem og aðstöðu í íþróttahúsinu á Kleppjárnsreykjum. Styrktarþjálfunin fer svo fram í líkamsræktinni í Borgarnesi og í Heilsuhofi í Hátúni á Kleppjárnsreykjum.“