segir Ingibjörg Ösp Júlíusdóttir forstöðumaður Bókasafns Akraness

Margt hefur breyst í starfsemi almenningsbókasafna á liðnum árum. Frá því eins og var á fyrri tímum að vera eingöngu með útlán á bókum yfir í það að verða fjölbreyttar samfélags- og menningarmiðstöðvar. Þessi þróun á sér stað út um allan heim. Fram kom í nýlegri skýrslu Norrænu ráðherranefndarinnar að bókasöfn á Norðurlöndum eru í auknum mæli að breytast í menningar- og samfélagsmiðstöðvar. Við búum í þekkingarsamfélagi og það er hlutverk bókasafna að bjóða aðgang og tækifæri fyrir alla. Þannig eru bókasöfn leiðandi afl í þróun samfélaga. Tíðindamaður Skessuhorns leit á dögunum við á Bókasafni Akraness og hitti að máli Ingibjörgu Ösp Júlíusdóttur, forstöðumann safnsins, og innti hana eftir þeim breytingum sem orðið hafa á starfsemi þess.

„Við erum alltaf fyrst og fremst bókasafn og sinnum þeirri faglegu starfsemi eins og lög gera ráð fyrir. En við, eins og allir aðrir, verðum að fylgja tímanum og aðlaga okkur að breyttum raunveruleika og við vitum öll hversu miklar breytingar hafa orðið á samfélaginu síðustu 25 ár. Við á bókasöfnunum höfum færst frá spjaldskrám að sjálfsafgreiðsluvélum og þrátt fyrir að starf bókavarðarins sé á margan hátt það sama þá hefur tæknivæðingin breytt öllum ferlum hjá okkur og gert okkur mögulegt að auka fjölbreytni í starfseminni. Við höfum svo fína aðstöðu hérna á safninu til þess að gera svo margt og þjóna samfélaginu betur,“ segir Ingibjörg.

Fjölbreytt starfsemi

„Við tökum á móti hópum úr grunnskólunum og frá leikskólunum og svo eru foreldramorgnarnir. Í tengslum við foreldramorgnana reynum við að hafa a.m.k. tvo stærri viðburði með þeim hópi á ári eins og skyndihjálparnámskeið eða fyrirlestra. Handavinnuhópur hittist annan hvern miðvikudag. Þá erum við með tvo bókahópa þar sem ég vel bók sem hópurinn les og svo hittumst við mánuði síðar og ræðum bókina sem og aðrar bækur sem hópurinn hefur verið að lesa. Í öðrum hópnum er valin ljóðabók sem síðan er rædd. Þá er það sumarlesturinn fyrir börnin en hann stendur yfir frá miðjum júní þar til síðari hluta ágústmánaðar. Börnin fá lestrardagbók sem þau skrá hvað þau lesa. En það fer svo eftir þema sumarsins hvernig við útfærum sumarlesturinn. Við fimmtu hverja bók fá þau að gera eitthvað skemmtilegt. Í fyrra gerðu þau barmmerki og fyrir tveimur árum var sjóræningja þema þar sem þau söfnuðu sjóræningjasilfri á hálsmen. Við höfum síðan einn skemmtidag með krökkunum; húllumhæ, og í fyrra mætti Jörgen Nilsson og gerði daginn mjög eftirminnilegan og skemmtilegan með krökkunum. Núna erum við á fullu í undirbúningi fyrir sumarið og ætlum að gera okkar besta til að hafa líf og fjör alla daga. Það er líklega eitt það mikilvægasta sem við getum gert; að halda bókum að börnunum og kenna þeim að njóta þeirra.

Við höfum verið að prófa okkur áfram með ýmis verkefni. Núna er til að mynda hægt að komast í saumavél á safninu, fá lánuð kökuform og sprautustúta og ekki má gleyma spilunum.“

*Jörgen Nilsson í essinu sínu á Húllumhæi á síðasta ári.*

Fjölskyldudagar á laugardögum

„Laugardagarnir hjá okkur eru mjög vel sóttir,“ segir Ingibjörg. „Við höfum lagt áherslu á að laugardagar séu fjölskyldudagar þar sem allir geta komið saman og notið. Opið er frá klukkan 11 á morgnanna til kl. 14 eftir hádegi. Þá er allskonar skemmtilegt í boði. Núna fyrir páskana má búast við að við verðum með fjölbreytt páskaföndur og að sjálfsögðu er alltaf heitt á könnunni. Öðru hverju erum við með bjölluþraut. Þá strengjum við band með bjöllum á þvers og kruss og takmarkið er að reyna að komast í gegnum vefinn án þess að hreyfa við bjöllunum.

Við auglýsum dagskrá safnsins á heimasíðu okkar og á facebook en fyrir þá sem vilja fylgjast með því sem framundan er þá er auðveldast að fylgjast með á facebook þar sem við höldum síðunni vel virkri.“

Námsverið Svövusalur er mikið notað

Ingibjörg Ösp sagði að upphaflega hafi námsverið Svövusalur verið mikið notað varðandi fjarnám hjá nemendum en í dag er ekki lengur þörf fyrir sérstakan fjarfundabúnað. En salurinn er mikið notaður af nemendum sem vilja vera í næði við nám sitt. Salurinn er opinn á opnunartíma bókasafnsins og svo geta nemar sótt um lykil að salnum á heimasíðu safnsins og þá fengið aðgang allan sólarhringinn. Aðstæður geta verið misjafnar hjá fólki heima fyrir og það getur verið erfitt að sinna námi þar, þannig að þetta er góð lausn og þú getur jafnframt valið tíma sem hentar þér hvenær sem er sólarhringsins.“

Sýningar á myndlist og handverki

Ingibjörg Ösp sagði að reglulega séu sýningar á myndlist og handverki. Á heimasíðunni er eyðublað þar sem hægt er að sækja um að halda sýningu. Mjög líflegt var á Vökudögum sem eru í byrjun nóvember ár hvert. Þá var hið árlega rithöfundakvöld haldið í tíunda skipti og samsýning fjögurra listamanna undir yfirskriftinni Skapandi straumar. Nýleg uppákoma var þegar Haraldur Benediktsson bæjarstjóri var með viðburð þar sem hann sagði frá lífshlaupi Jóns Hreggviðssonar meints snærisþjófs frá Rein. Ýmsar útfærslur af skiptimörkuðum hafa verið prófaðar eins og fyrir jólin þegar hægt var að koma með spariföt og setja á fataslá hjá okkur og taka önnur í staðinn ef áhugi var fyrir því. Fyrir öskudaginn og Hrekkjavökuna var hægt að koma með búninga og skipta út á fataslánni hjá okkur. Tvö síðustu vor höfum við verið með blóma- og afleggjaraskiptimarkað að vori. Ekki má gleyma kallaspjallinu í hádeginu á föstudögum þar sem karlpeningurinn getur hist og rætt málin.“ Eins og á þessu sést, sagði Ingibjörg Ösp, þá er aldrei að vita hvað þeim dettur næst í hug. „Takmarkið er að hafa sem mest um að vera í húsinu og allar hugmyndir velkomnar. Við viljum hafa líf á safninu og að fólk geti leitað hingað og átt góðar stundir saman.“

„Við höfum svo fína aðstöðu til að gera svo margt og þjóna samfélaginu betur“

segir Ingibjörg Ösp Júlíusdóttir forstöðumaður Bókasafns Akraness

segir Ingibjörg Ösp Júlíusdóttir forstöðumaður Bókasafns Akraness