Þrír leikir voru í Lengjubikarnum í knattspyrnu um helgina hjá liðunum af Vesturlandi. Niðurstaðan var tveir sigrar og eitt tap og gott gengi Vesturlandsliðanna í Lengjubikarnum heldur áfram.

Víkingur vann Árbæ

Víkingur Ólafsvík og Árbær áttust við í B deild karla í riðli 2 og var leikurinn á laugardagskvöldið á gervigrasvelli Þróttara í Reykjavík. Ástþór Ingi Runólfsson kom Árbæ yfir snemma leiks en Luis Romero Jorge jafnaði skömmu síðar fyrir Víking. Eftir um hálftíma leik skoraði Luke Williams fyrir Ólsara og staðan 2-1 í hálfleik. Luke var aftur á ferðinni á 64. mínútu og tæpum tíu mínútum síðar gulltryggði Eyþór Örn Eyþórsson öruggan sigur Víkings. Sex mínútum síðar skoraði Jordan Tyler fyrir Árbæ og reyndist það síðasta mark leiksins, lokatölur voru 4-2 Víkingi í vil. Víkingur á veika von um að vinna riðilinn en þarf að treysta á að Þróttur Vogum tapi á móti Elliða og þeir vinni sigur á KV um næstu helgi. Leikur KV og Víkings fer fram á KR-velli næsta laugardag og hefst klukkan 14.

Kári með stórsigur á Sindra

Kári tók á móti Sindra í B deild karla í riðli 3 í Akraneshöllinni á laugardaginn og vann sinn fjórða sigur í röð. Mikael Hrafn Helgason skoraði fyrsta mark leiksins fyrir Kára á 37. mínútu og fjórum mínútum síðar fékk Kjartan Jóhann Einarsson leikmaður Sindra sitt annað gula spjald og þar með rautt. Einum fleiri voru Káramenn fljótir að nýta sér liðsmuninn og á tíu mínútna kafla í seinni hálfleik var Mikael Hrafn kominn með þrennu. Hektor Bergmann kom Kára í 4-0 á 69. mínútu og tíu mínútum fyrir leikslok skoraði Sveinn Svavar Hallgrímsson fimmta mark heimamanna, lokatölur 5-0 fyrir Kára. Í síðasta leik Kára næsta laugardag mæta þeir liði Ægis í Akraneshöllinni og hefjast leikar klukkan 14. Með sigri eða jafntefli tryggja þeir sér efsta sæti riðilsins og sæti í undanúrslitum B deildar sem verða um miðjan apríl.

Skallarnir töpuðu á móti Tindastól

Skallagrímur og Tindastóll mættust í C deild karla í riðli 4 á laugardaginn og var viðureignin í Akraneshöllinni. Jónas Aron Ólafsson skoraði fyrir Tindastól snemma leiks og hann var aftur á ferðinni þremur mínútum fyrir leikhléið og staðan í hálfleik 0-2. Ekki voru fleiri mörk skoruð í seinni hálfleik og gestirnir fóru heim norður með stigin þrjú. Síðasti leikur Skallagríms í riðlinum verður á móti KM næsta sunnudag í Kórnum í Kópavogi og hefst klukkan 17.

Víkingur og Kári með góða sigra í Lengjubikarnum