Páll Bergþórsson, veðurfræðingur og fyrrverandi veðurstofustjóri, er látinn á 101. aldursári. Hann lést á Hrafnistu í Hafnarfirði sunnudaginn 10. mars síðastliðinn eftir stutt veikindi.

Páll fæddist að Fljótstungu í Hvítársíðu 13. ágúst 1923. Foreldrar Páls voru Kristín Pálsdóttir f. 1885 og Bergþór Jónsson f. 1887, bændur í Fljótstungu. Fyrir áttu þau tvær stúlkur; Guðrúnu sem var fædd árið 1920 og Þorbjörgu fædda 1921. Mögulega hefur heyskapur verið langt kominn þegar Páll kom í heiminn 13. ágúst. En engu að síður má reikna með að mikið annríki hafi verið á bænum þar sem dæturnar tvær voru svo ungar. Síðar fæddist Jón bróðir þeirra, það var í september 1924. Að lokum komu svo þrjár systur til viðbótar í heiminn; Sigrún (1927), Gyða (1929) og Ingibjörg sem rak lestina, fædd árið 1930. Af systkinunum frá Fljótstungu er einungis Gyða á lífi.

Eiginkona Páls var Hulda Baldursdóttir sem lést fyrir um ellefu árum. Þau eignuðust þrjú börn; Baldur, Kristínu og Bergþór. Hulda var frá Þúfnavöllum í Hörgárdal og þar búa ættmenni hennar enn. Þau Páll voru jafnaldrar, kynntust á Veðurstofunni og voru saman í rúmlega sextíu ár.

Páll lauk stúdentsprófi frá Menntaskólanum í Reykjavík 1944 og að loknu tveggja ára námi í verkfræði við Háskóla Íslands hélt hann til Svíþjóðar 1947. Hann stundaði nám í veðurfræði við Sveriges Meteorologiska och Hydrologiska Institut (SMHI) í Stokkhólmi og útskrifaðist þaðan 1949.

Þegar heim kom hóf Páll störf sem veðurfræðingur á Veðurstofu Íslands og sneru meginverkefni hans á stofnuninni að almennri veðurspáþjónustu og flugveðurþjónustu allt til ársins 1982. Hann var deildarstjóri veðurfarsrannsókna frá 1982 til 1989 og 1. október það ár var hann skipaður veðurstofustjóri. Því embætti gegndi hann til ársloka 1993, þá sjötugur að aldri. Meðfram störfum við veðurþjónustu sinnti Páll fjölþættum verkefnum. Hann var veðurfræðingur í sjónvarpinu um árabil og kom veðurfréttum þannig á framfæri að auðskilið væri almenningi. Páll var meðal frumkvöðla hér á landi í rannsóknum á veðurfarsbreytingum og beindi snemma sjónum sínum að hnattrænni hlýnun og ekki síst áhrifum hennar á íslenskan landbúnað. Hann rannsakaði einnig samspil veðurfars og mannfjöldaþróunar.

Andlát – Páll Bergþórsson