Gjörningatríó – gönguleið meðfram mæðiveikigirðingu, málþing og sveitaball

Látinn er listamaðurinn Hreinn Friðfinnsson, 81 árs að aldri. Hreinn var frá Bæ í Miðdölum í Dalasýslu, fæddur árið 1943. Ungur lærði hann myndlist og hefur í áratugi unnið að listsköpun sinni í Amsterdam í Hollandi, eða allt frá árinu 1971. Síðustu mánuði fyrir andlát sitt var Hreinn í töluverðum samskiptum við hjónin Helgu og Þorgrím á Erpsstöðum í Dölum, en í undirbúningi var gjörningatríó í sumar, eins og þau kalla það. Í fyrstu var það í samstarfi við Hrein, en verður nú til minningar um hann. Gefum Þorgrími orðið:

„Hreinn átti rætur sínar hér í Dölum og var mjög þekktur listamaður í Hollandi. Sjálfur þekki ég ekki listsögu hans og hitti hann aldrei í eigin persónu en ræddi hins vegar reglulega við hann í síma. Fyrir þremur árum komst ég fyrst í samband við hann og frá þeim tíma höfum við talast við um það bil mánaðarlega, þó þær samræður hafi sjálfsagt ekki verið mjög djúpar. En síðastliðið hálfa árið höfum við verið að undirbúa það sem við í daglegu tali köllum Hreinshlaupið, en það hefur nú undið svolítið upp á sig og endað sem Gjörningatríó. Ég fékk svo styrk frá Uppbyggingarsjóði Vesturlands til að halda Gjörningatríóið. Þrátt fyrir fráfall Hreins, þá munum við halda okkar striki og verða þessir þrír gjörningar framkvæmdir á áður áætluðum tíma, allir í sumar,“ segir Þorgrímur.

Hreinn vann sem ungur maður tvö sumur við það að fylgja mæðuveikigirðingunni milli Dala,- Mýra- og Hnappadalssýslna. Þá fór hann af stað við hliðið uppi á Bröttubrekku og hélt í vestur þar til hann kom út fyrir Gunnarsstaði. Þar var horn á girðingunni og hún lá því næst beinustu leið til sjávar við Hvammsfjörð, utan við Gunnarsstaði. Flestir sem sinntu þessu starfi höfðu hest til umráða, en í Bæ var ekki hestur aflögufær til þessa starfs og því var það svo að Hreinn gekk þessa leið, annan hvern dag frá því fénu var sleppt og fram að leitum, eða í um þrjá mánuði. Leiðin er milli 45 og 50 km löng og því má segja að um þó nokkuð afrek hafi verið að ræða, að ganga þetta svona stíft annan hvern dag. Í sumar ætlum við að standa fyrir hlaupi/göngu 23. júní þar sem meiningin er að fólk flykkist til að arka þessa leið í spor Hreins, hvort sem er gangandi eða hlaupandi inn á milli. Hreinn kvaðst hafa verið fljótastur að fara þessa leið á 14 klukkutímum, en annars að jafnaði um 18 tíma.

„Gjörningatríó okkar Helgu og Hreins mun standa þrátt fyrir fráfall hans, enda vorum við búin að undirbúa það með hans tilsögn og engin ástæða til að breyta um stefnu. En tríó er eins og allir vita eitthvað þrennt. Hin tvö atriðin sem við erum með í þessu tríói eru 7. júli, en þá verður viðburður í Árbliki, þar sem sett verður upp sýning á nokkrum verka hans ásamt stuttu málþingi um Hrein og hans verk. Síðan 17. ágúst verður framkvæmdur gjörningur sem Hreinn hefur haft á prjónunum í mörg ár en aldrei komist til að framkvæma, en það er að slá upp ekta gamaldags sveitaballi og mun sá gjörningur verða framkvæmdur að Röðli á Skarðsströnd, en þar hefur ekki verið haldinn dansleikur í um 70 ár. Þar munu félagar í Nikkólínu skiptast á um að spila fyrir dansi.“

Þorgrímur segir að það hafi verið laugardaginn 24. febrúar síðastliðinn sem hann ræddi síðast við Hrein um þessa viðburði sem framundan eru. „Við vorum að leggja loka drög að planinu. Fráfall hans er okkur auðvitað áfall, en engu að síður þá munum við ljúka við þessa gjörninga og í stað þess að minnast einungis 60 ára starfsafmælis hans, þá verður hér einnig um minningargjörninga að ræða og á það helst við um gjörninginn 7. júlí sem við þurfum aðeins að endurskipuleggja. Það var virkilega gaman að ná að kynnast þessum heiðursmanni, þó svo að við aldrei hittumst, en spjölluðum þeim mun meira í síma,“ segir Þorgrímur í samtali við Skessuhorn.

Framundan eru gjörningar til minningar um Hrein Friðfinnsson

Gjörningatríó - gönguleið meðfram mæðiveikigirðingu, málþing og sveitaball

Gjörningatríó - gönguleið meðfram mæðiveikigirðingu, málþing og sveitaball