Guðmunda Ólafsdóttir, framkvæmdastjóri ÍA, tekin tali

Guðmunda Ólafsdóttir tekur á móti blaðamanni með brosi á vör og er hún með á reiðum höndum tölur um iðkendur íþrótta á Akranesi. „Ég er tölu manneskja, þykir vænt um tölur og hvað þær geta sýnt okkur. Við erum með 19 aðildarfélög innan Íþróttabandalags Akraness, erum nú að sjá að rúmlega 70% 6-18 ára barna og unglingar stundar íþróttir hér á Akranesi og 86% elstu árganga á leikskólum Akranes er í skipulögðu íþróttastarfi sem sýnir það að Akranesi er íþróttabær,“ segir Guðmunda og heldur áfram. „Íþróttabandalagið heldur þjálfarafundi, en þá falla æfingar niður og þjálfarar koma í kennslu og/eða endurmenntun og er þetta fyrir alla þjálfara. Akraneskaupstaður er með íþróttahreyfinguna í öllu hjá sér, ÍA á sæti í starfshópum sem kemur að málefnum barna og eldri borgara, í rauninni með hugsun á hreyfingu allt lífið í gegn,“ segir Guðmunda.

*Guðmunda Ólafsdóttir, framkvæmdastjóri ÍA. Ljósm. hig*

Stefnumótun í starfi

Er ÍA með einhvers konar stefnumótun fyrir aðildarfélög sín? „Íþróttabandalagið á gamla íþróttastefnu, samtal hefur átt sér stað við Akraneskaupstað um að fara í íþrótta/lýðheilsu stefnu. Það hefur ekki verið farið í það því Akraneskaupstaður er að fara í innleiðingu á nýrri menntastefnu og eins er verið að kynna nýja heildarstefnu Akraneskaupstaðar. Í framhaldi af þessu öllu mun íþróttahreyfingin á Akranesi og Akraneskaupstaður vinna saman í áframhaldandi stefnumótun um íþróttir og lýðheilsu. Á formannafundum ÍA hefur verið farið aðeins í vinnu með stefnumótunar spurningar með öllum sem þar mæta. Við aðstoðum við þau aðildarfélög ef þau leita til okkar í stefnumótunar vinnu,“ bætir Guðmunda við.

Aðstaða

Hvernig er staðan á aðstöðu hér á Akranesi? „Þetta er erfið spurning í augnablikinu með eitt hús lokað og annað í byggingu. Það er verið að byggja nýtt og flott parkethús á Jaðarsbökkum, sem er eftir sömu teikningu og Ólafssalur hjá Haukum í Hafnarfirði. Þar verður fyrsta flokks körfuboltavöllur, allt samkvæmt stöðlum FIBA. Íþróttahúsið við Vesturgötu er áætluð fyrir badminton og fleiri íþróttir en nýja húsið er hugsað undir körfubolta, blak og svo skólaíþróttir fyrir 800 nemendur í Grundaskóla. Það hefur samt ekki verið tekin nein loka ákvörðun um hvaða íþróttir verða nákvæmlega með skólaíþróttum á Jaðarsbökkum eða Vesturgötu. Þetta nýja hús verður gífurlega breyting fyrir íþróttakennara og þjálfara en aðstaðan verður fyrsta flokks. Úr nýja húsinu verður svo hægt að ganga inn í Akraneshöllina og út á grassvæði á Jaðarsbökkum. Í kjallara verða klefar, sem vonandi verða tilbúnir 2025 og verði þá hægt að nýta þá strax á Íslandsmóti í knattspyrnu 2025, en húsið er áætlað að verði tilbúið haustið 2025. Þá verðum við með þrjú íþróttahús í einhvern tíma, eitt á Vesturgötu og tvö á Jaðarsbökkum en það er vinna í gangi um nýtt skipulag fyrir svæðið á Jaðarsbökkum svo við bíðum og sjáum hvað verður gert,“ segir Guðmunda. „Við erum líka svo heppin að vera með fullkomið hópfimleikahús, flottan golfvöll, nýja reiðhöll, klifursal og keilusal svo eitthvað sé upptalið,“ nefnir Guðmunda.

Aukning eða samdráttur

Hefur Guðmunda orðið vör við samdrátt eða aukningu í íþróttastarfi á Akranesi? „Mjög góð virkni er hjá börnum í íþróttum hér og er mjög hátt hlutfall sem stundar ekki endilega skipulegt frístundastarf heldur íþróttastarf. Við sjáum að hnefaleikar eru að vera gríðarlega vinsæl íþrótt, samkvæmt skráningu í Sportabler, forrit sem heldur utan um fjölda iðkenda hjá ÍA, þá eru 25 iðkendur í hnefaleikum fyrir árið 2023 en árið 2022 voru það aðeins fjórir sem voru skráðir í hnefaleika. Mikil aukning og áhugi á hnefaleikum er um allt landið og við erum ánægð með þessa miklu aukningu hér hjá ÍA,“ segir Guðmunda en hvað með aðrar íþróttir? „Það hefur verið fjölgun í knattspyrnu, fjölgun í golfi en örlítil fækkun á sama tíma í fimleikum. Kannski er hægt að skýra það með að við þurftum að loka einu íþróttahúsi hjá okkur síðastliðið haust. Skóla- og frístundaráð gerði þær breytingar að sundlaugin yrði lokuð á milli klukkan 15.00 og 17.00 fyrir almenning og væri þá æfingatímar fyrir sundfélagið. Það hefur gert það að verkum að það fjölgaði 2023 töluvert og gerði það einnig að verkum að krakkar og unglingar á sama aldri geta æft saman, hvort sem einstaklingur sé í A flokki, B flokki eða C flokki. En það er einn aldursflokkur sem ég er að rýna í þessa dagana og er það 10 ára aldurinn, það virðist sem þau börn séu ekki með eins mikla virkni í íþróttum og annar aldur og er það eitthvað sem við erum að skoða,“ segir Guðmunda.

Afreksíþróttasviðið hjá FVA hefur staðið sig vel undanfarin ár með að halda úti góðu starfi. „Unglingar eru að koma hér á afreksbraut í Fjölbrautaskóla Vesturlands. Þau eru að koma til að komast á æfingar og kennslu í kringum afreksíþróttirnar og eru þetta unglingar sem eru sumir hverjir að koma á vistina og eru að stunda fimleika, sund eða fótbolta og á það starf eftir að eflast enn frekar,“ segir Guðmunda.

Sjálfboðaliðar

Sjálfboðaliðar eru gríðarlega mikilvægir til að halda út starfi aðildarfélaga. Blaðamaður forvitnast um stöðu sjálfboðaliða hjá ÍA? „Það er varla eitt félag á Íslandi sem á ekki í erfiðleikum með að manna í sjálfboðastarf, held ég. Þetta er mikilvægt því ef ekki næst að manna í stjórn, þá er ekkert félag. Það virðist vera smá vakning hér með að fá fólk í stjórnir til að starfið geti haldið áfram. Og þar getur skrifstofa ÍA komið með aðstoð fyrir nýtt fólk í sjálfboðastarfi en það er eitt stærsta hlutverk skrifstofu ÍA að geta verið fólki innan handa í öllum félögum og gefið stuðning og ráðgjöf,“ bætir Guðmunda við. „Við köllum eftir tilnefningum frá aðildarfélögum fyrir þing ÍA á hverju ári þar sem við heiðrum sjálfboðaliða með bandalagsmerki ÍA. Okkur finnst mikilvægt að sýna fram á að þessir aðilar, þessir frábæru sjálfboðaliðar okkar, eru að gera gríðarlega gott og mikilvægt starf á Akranesi,“ segir Guðmunda. „Eins höfum við síðustu tvö ár heiðrað fyrirtæki á Akranesi sem hefur styrkt við íþróttastarfið á Akranesi. ÞÞÞ var fyrsta félagið sem hlaut samfélagsskjöldinn og hefur það fyrirtæki staðið við bakið á íþróttum á Akranesi með myndar brag í fjölda ára.“

Samstarf á Vesturlandi

„Við hófum samstarf fyrir nokkru við öll íþróttahéröðin hér á Vesturlandi. Við tölum saman nánast á hverjum einasta degi; ÍA, UMSB, HSH og UDN. Öll þekking fer á milli okkar, við erum að læra hvert af öðru, samræmi er á milli vinnubragða, verklagsreglur og fleira. Við erum ólík en vinnum vel saman og náum að koma ýmsum hugmyndum, athugasemdum og ýmsu öðru fram til að fá viðbrögð og speglun. Þó svo að við séum almennt að vinna einar, allt konur sem eru framkvæmdastjórar í héruðunum og UDN formaður sem er einnig kona, þá finnum við með þessu þétta samstarfi vel fyrir að vera samstarfsaðilar. Þetta samstarf hefur gert mikið fyrir okkur og auðveldað margt í okkar starfi.

Ég sem framkvæmdastjóri ÍA er í forréttinda starfi. Að fá að vinna með þessu frábæra fólki sem kemur að íþróttastarfi á Akranesi, hvort sem það eru sjálfboðaliðarnir eða starfsfólk, eru forréttindi.“

Þetta er íþróttabær

Guðmunda Ólafsdóttir, framkvæmdastjóri ÍA, tekin tali

Guðmunda Ólafsdóttir, framkvæmdastjóri ÍA, tekin tali