Rætt við Hjörleif Kristin Hjörleifsson, formann HSH

Hjörleifur Kristinn, eða Kiddi eins og hann er jafnan kallaður, er nýkomin úr viðhaldsvinnu í Skipavík þegar blaðamaður nær af honum tali, í íþróttahúsinu í Stykkishólmi.

Er HSH með einhvers konar stefnumótun fyrir aðildarfélög? „Við fórum um Snæfellsnesið í haust, í fundaherferð og náðum að sjá hvernig félögin eru að standa sig. Fótbolti, sund, frjálsar íþróttir og körfubolti eru í frábærum málum og það hefur hjálpað félögum mikið það góða samstarf sem er á milli þeirra. Eins og til dæmis er samstarf yngri flokka hjá Skallagrími og Snæfelli í körfubolta og á milli Víkings/Reynis, UMFG og Snæfells í fótbolta. Það er mikilvægt að setja stefnu hvert á að fara og hverju á að ná út úr starfinu. Það er ekki sanngjarnt að leggja sjálfboðaliðavinnu í eitthvað starf sem ekki er vitað hvert á að fara og það er erfitt að halda úti ákveðnum gæðum í langan tíma, eins og til dæmis þegar körfuboltinn hér í Stykkishólmi fer í hæstu hæðir, en dettur svo niður,“ segir Kiddi.

*Hjörleifur Kristinn Hjörleifsson. Ljósm. hig*

Aðstaða og ekki aðstaða

Hvernig lítur aðstaðan út fyrir íþróttastarf? „Húsið okkar er fínt en það er því miður sprungið og er ekki hægt að bjóða deildunum alla þá tíma sem þær vilja. Það er farið að kalla eftir bættri íþróttaaðstöðu og er draumurinn að fá nýtt fjölnota íþróttahús, með þá gervigrasi og hlaupabraut. Íbúar Stykkishólms gætu þá notað íþróttahúsið einnig en mikill fjöldi eldri borgara eru að hreyfa sig reglulega og myndi slíkt hús bæta við aðstöðu þess hóps, segir Kiddi og bætir við að meirihluti bæjarstjórnar hafi verið með það á stefnuskrá sinni að hefja vinnu/undirbúning að byggingu fjölnota íþróttahúss. „Og svo er draumur hér innanhúss í íþróttahúsinu að bæta við þetta hús. Bæta við báða gafla hússins þar sem hægt væri að hafa geymslupláss, fundaraðstöðu, þrekmiðstöð, skrifstofur fyrir starfsmenn deilda og svo framvegis.“

Sprenging í frjálsum íþróttum

Blaðamaður verður var við mikinn fjölda ungmenna á leið á æfingu. „Um 90% af krökkum í Stykkishólmi eru að stunda íþróttir og um 120 krakkar af 160 nemendum eru að æfa körfubolta,“ segir Kiddi um leið og barnabarn hans hoppar inn og heilsar afa sínum. „Það hefur verið gríðarlega mikil aukning í frjálsar íþróttir, eftir að tvær fyrrverandi landsliðskonur í frjálsum íþróttum hófu hér störf en það eru þær Björg Gunnarsdóttir og Sveinbjörg Zophoníasdóttir sem hafa komið með mikinn kraft inn í starfið. 60-70 krakkar eru nú að æfa frjálsar íþróttir en því miður fá frjálsar einn tíma í viku fyrir hvern flokk, sem er of lítið,“ segir Kiddi og lítur nú yfir sal íþróttahússins. „Þjálfarar eru svo mikilvægir í öllu starfi og til dæmis er hún Sveinbjörg oft að keyra börn úr Eyja- og Miklaholtshreppi á æfingar í Stykkishólmi sem er frábært. Það er mikil frjálsíþróttahefð hérna í bænum auk þess sem hefur klárlega vantað einstaklingsíþróttir inn í flóruna af afþreyingu fyrir börnin.“

Aukning í íþróttir á tímum Covid

„Það var sprenging hjá okkur á tímum Covid sem var algjörlega á skjön við önnur félög. Félög voru að tala um brottfall úr íþróttum og það mikla vandamál sem það væri að fá nýja og/eða eldri þátttakendur í íþróttir, þá var það ekki hér í Stykkishólmi. Við fundum fyrir miklum áhuga og það hefur verið stöðug aukning í íþróttastarfið hér.“

Herra sjálfboðaliði

Sjálfur hefur Kiddi verið sjálfboðaliði í íþrótta- og ungmennafélagshreyfingunni frá árinu 1994. Á síðasta ári var hann sæmdur gullmerki UMFÍ fyrir störf sín í þágu hreyfingarinnar og silfurmerki KKÍ fyrir störf sín í þágu körfuboltasamfélagsins. „Allt í kringum íþróttastarf, hvort að það sé þjálfun, akstur, samskipti, foreldramál og fleira er orðið svo gríðarlega umsvifamikið í dag. Foreldrar í sveitum eru búnir að standa sig mjög vel í að keyra börn sín á æfingar en börnin þurfa að sækja í stærri þéttbýliskjarna til að stunda íþróttir. Þetta er gríðarleg vinna sem er oft á tíðum erfitt að halda úti og er því mjög mikilvægt að halda vel utan um alla þá aðila sem koma að sjálfboðastarfi og reyna að verðlauna þessa aðila með einhverju móti,“ segir hann. Því má bæta við að á síðasta ársþingi HSH (Héraðssamband Snæfellsness- og Hnappadalssýslu) voru sjálfboðaliðar heiðraðir ásamt því íþróttafólki sem var tilnefnt sem íþróttafólks HSH.

Stöðug aukning í íþróttastarfi

Rætt við Hjörleif Kristin Hjörleifsson, formann HSH

Rætt við Hjörleif Kristin Hjörleifsson, formann HSH