Bjarney Lárudóttir Bjarnadóttir, framkvæmdastjóri UMSB, tekin tali

Blaðamaður Skessuhorns tekur sér sæti á skrifstofu UMSB og forvitnast um starf UMSB þessa dagana. „Starfsemi UMSB hefur breyst mikið frá því sem var þegar sambandið var að halda sund- og frjálsíþróttamót, þau eru nú á herðum aðildarfélaganna en UMSB er stjórnsýslan í kringum það, okkar hlutverk er að reyna að efla störf aðildarfélaganna með upplýsingagjöf, umsýslu, aðhaldi og eftirliti, auk þess sem við erum tengiliður þeirra við UMFÍ og ÍSÍ og svo sveitarfélögin á sambandssvæðinu,“ segir Bjarney en alls eru 14 aðildarfélög undir merkjum UMSB. Stórt verkefni er framundan, eða unglingalandsmót UMFÍ sem haldið verður í Borgarnesi í byrjun ágúst. Við ræðum það einnig.

*Bjarney Lárudóttir Bjarnadóttir, framkvæmdastjóri UMSB. Ljósm: hig*

Stefnumótun í starf

Er UMSB með einhverja stefnumótun fyrir aðildarfélögin? „Við erum með tvo formannafundi á ári og það er á stefnuskránni að vera með einhvers konar vinnustofur fyrir formenn og forráðamenn deilda og félaga til að þau geti komið með hugmyndir um starfið, hvernig þau sjá starfið fyrir sér og hvert við viljum stefna. Það er mikilvægt að við séum öll að ganga í takt og það gerist ekki nema með góðu samtali við hvert annað, en ekki með umtali um hvert annað eins og vill því miður stundum verða,“ nefnir Bjarney.

Aðstaða

Hvernig lítur aðstaðan út fyrir íþróttastarf á svæði sambandsins? „Aðstaðan í dag er því miður ekki nægilega góð. Sundlaugin hér í Borgarnesi er frábær en íþróttahúsið er því miður löngu sprungið. Íþróttahúsið hefur þjónað sínum tilgangi gríðarlega vel en það vantar góða aðstöðu. Aðstöðu fyrir yngri iðkendur sem eru að koma til dæmis frá Varmalandi eða Bifröst, og þau geti þá verið hér jafnvel í frístund og íþróttum. Væru þá í öruggum höndum í íþróttahúsinu eða annars staðar þar til þau yrðu sótt eða þeim ekið heim til sín. Íþróttahúsin á Varmalandi og Kleppjárnsreykjum eru líka komin til ára sinna og það þyrfti að gera endurbætur á sundlauginni á Kleppjárnsreykjum. Mig langar samt að hrósa því hversu öflugt íþróttastarfið er samt í sveitarfélaginu, bæði í Borgarnesi og á Kleppjárnsreykjum, það eru allir að gera eins gott úr þessari stöðu og hægt er.

En ég fagna því að hér er verið að fara í byggingu íþróttamannvirkja sem byrjar með fjölnota íþróttahúsi sem er gríðarlega mikilvægt fyrir stóran hóp knattspyrnuiðkenda, sem hafa þurft að æfa við óviðunandi aðstæður á veturna eða sækja sína æfingar út á Skaga. Það mun líka verða gríðarleg lyftistöng fyrir frjálsar íþróttir og mun vonandi líka koma sér vel fyrir eldra fólk sem getur þá nýtt húsið til að fara í göngutúra þegar illa viðrar eða færðin er slæm. Með nýju parkethúsi verður svo vonandi hægt að sjá börn og unglinga „hanga í íþróttahúsinu“, þar sem þau eru velkomin og örugg. Vonandi getur það líka nýst sem skrifstofuhúsnæði fyrir UMSB og aðildarfélögin. Eins gerir parkethús það að verkum að það kemur meiri fjölbreytileiki inn í íþróttastarfið og jafnvel hægt að bjóða upp á allskyns námskeið, þar sem börn og unglingar geti prufað sig áfram og þannig er hægt að greina hvort að það sé grundvöllur að halda áfram með þá íþróttagrein,“ segir Bjarney.

Aukning eða samdráttur

Hefur Bjarney orðið vör við samdrátt eða aukningu í íþróttastarfi? „Ég er að bíða eftir spennandi greiningu frá HR en skólinn er að greina fyrir okkur íþróttaiðkun eftir kyni, aldri, búsetu og fleiru hjá iðkendum hér á svæðinu en við erum að taka eftir að það vantar heilu árgangana í íþróttir. Það er þó margt jákvætt í gangi, t.d. er starfið hjá Umf. Reykdæla orðið mjög öflugt, mjög fjölbreytt starf í gangi þar og Umf. Stafholtstungna stefnir að því að stofna rafíþróttadeild, auk sem Skallagrímur heldur úti mjög flottu starfi. En ég held að sóknarfærin liggi mest í einstaklingsíþróttum eins og frjálsum íþróttum, rafíþróttum, pílukasti og jafnvel lyftingum og/eða kraftlyftingum. Einnig vantar íþróttir fyrir fatlaða, bæði börn og þau sem eldri eru, og ég veit að það er söknuður af Kveldúlfi, það væri gott að geta komið því félagi af stað. Við höfum orðið vör við það í kringum okkur að það er mikil eftirspurn eftir meiri fjölbreytni í íþróttaflóruna en þá kemur það á móti að okkur vantar húsnæði. Okkur langar að hér í okkar samfélagi verði fjölbreytileiki áberandi og þannig náum við að virkja fólk til þátttöku og gert fjölbreyttum hópi fólks kleift að taka þátt í íþrótta- og tómstundastarfi hér í Borgarbyggð. Samfélagið er fjölbreytt og íþrótta- og tómstundastarf þarf að endurspegla það,“ segir Bjarney.

Sjálfboðaliðar

Sjálfboðaliðar eru gríðarlega mikilvægir til að halda úti starfi aðildarfélaga. Blaðamaður forvitnast um stöðu sjálfboðaliða hjá UMSB. „Við erum það heppin að eiga marga frábæra sjálfboðaliða, sem hafa starfað innan hreyfingarinnar í mörg ár og jafnvel áratugi. Við verðum að halda vel utan um þetta fólk, sýna því hversu mikils virði það er því án þeirra væri ekkert starf. Fyrir utan að reyna að létta undir með starfi aðildarfélaganna og sjálfboðaliða þá er eitt verkefna UMSB núna að finna leiðir til að koma meira fjármagni inn í starf aðildarfélaganna svo að þau geti sinnt sínu faglega starfi en þurfi ekki að eyða öllum sínum tíma og orku í fjáraflanir, hreinlega bara til að hægt sé að halda úti starfi félagsins. Fólk er að bjóða sig fram í stjórn til að styðja við starf félagsins eða deildarinnar en það er ekki endilega eftirsóknarvert að taka sæti í stjórn og lenda svo bara í fjáröflunum,“ segir Bjarney.

Unglingalandsmót framundan

Nú verður unglingalandsmót UMFÍ haldið hér í Borgarnesi, fyrstu helgina í ágúst á þessu ári. Hvernig er staðan á skipulagi fyrir landsmótið? „Staðan í dag er mjög góð. Við funduðum strax síðasta haust og höfum náð að manna þvílíkt öfluga framkvæmdastjórn, en það vantar að vísu ennþá þrjá keppnisstjóra. Við erum með sterkan bakhjarl, Arion banka, sem studdi líka við bakið á á Landsmóti UMFÍ 50+ í hitteðfyrra en getum ávallt bætt við okkur bakhjörlum. Það er dýrt að halda svona mót en að sama skapi mikill ávinningur ef vel tekst til. Íbúafjöldinn á eftir að tvöfaldast í byrjun ágústmánaðar og því mikilvægt að vera vel undirbúin. Það verða fullt af skemmtilegum greinum í boði, allt frá þessum hefðbundnu íþróttagreinum eins og fótbolta, körfubolta, grashandbolta og grasblaki yfir í kökuskreytingar, upplestur og fleiri óhefðbundnar greinar. Breytingar hafa verið gerðar á fyrirkomulagi unglingalandsmóta og nú er hver grein kláruð á einum degi en dreifist ekki yfir alla helgina eins og var. Þannig þurfa keppendur ekki að hoppa á milli greina og geta því einbeitt sér betur að ákveðinni grein en gefst jafnframt tækifæri til að prófa fleiri greinar. Þó að unglingalandsmótið snúist fyrst og fremst um samveru og að hafa gaman þá er þetta líka keppni og oft mjög metnaðarfullir einstaklingar sem koma þarna saman þannig að það er mikilvægt að það sé metnaður í öllu í kringum mótið, sama hvort það sé dómgæsla eða önnur umgjörð. Þetta er mjög stór viðburður og mikilvægt að vanda vel til verka,“ bæti Bjarney við.

Samstarf á Vesturlandi

Það er mjög gott samstarf á milli UMSB, HSH, ÍA og UDN. Það hefur hjálpað gríðarlega mikið því að það er reynsla úr hinum og þessum störfum sem kemur þarna inn. Við þurfum ekki öll að vera að finna upp hjólið hver í sínu horni heldur erum við í góðu sambandi og hjálpum hvort öðru með ýmsa hluti tengda okkar samböndum, þó að það sé auðvitað margt ólíkt líka og mismunandi áskoranir á milli svæða. Aukið samstarf er þó alltaf af hinu góðu og það verður vonandi enn öflugra með tilkomu nýrra svæðisskrifstofa sem ÍSÍ, UMFÍ og mennta- og barnamálaráðuneytið eru að setja á laggirnar. Þannig að það er margt í gangi og spennandi tímar framundan hjá UMSB,“ segir Bjarney að lokum.

Öflugt íþróttastarf þrátt fyrir aðstöðuleysi

Bjarney Lárudóttir Bjarnadóttir, framkvæmdastjóri UMSB, tekin tali

Bjarney Lárudóttir Bjarnadóttir, framkvæmdastjóri UMSB, tekin tali