Jóhanna Sigrún Árnadóttir, formaður UDN, tekin í spjall

Blaðamaður settist niður með Jóhönnu formanni UDN og fór yfir starfið. „UDN er Ungmennasamband Dalamanna og Norður Breiðfirðinga og eru tvö sveitarfélög innan þess. Síðustu ár hefur íþrótta- og tómstundastarf vaxið talsvert innan sambandssvæðisins. Fjölbreytnin er orðin meiri og starfið dreifst meira yfir árið sem er breyting frá því að vera nánast eingöngu sumarstarf hjá þessum almennu ungmennafélögum. Hestamannafélagið hefur verið með námskeið og mót bæði á veturna og sumrin og Glímufélagið starfar mestmegnis yfir vetrartímann,“ segir Jóhanna.

Stefnumótun í starfi

Er UDN með einhverskonar stefnumótun fyrir aðildarfélög? „Við erum í endurskipulagningu á starfi UDN og því sem snýr að framkvæmdastjórn héraðsins. Hjálpar þar mikið að vera í samstarfi við aðra framkvæmdastjóra/formenn á Vesturlandi því það er að mörgu að hyggja og þetta orðið umsýslustarf nánast. Við sjáum fyrir okkur að ráða framkvæmdastjóra í hlutastarf og það væri góður kostur að viðkomandi gæti tekið að sér þjálfun líka,“ nefnir Jóhanna.

Aðstaða

Nú er fyrirhugað að byggja nýtt íþróttahús í Búðardal. „Það verkefni er á döfinni og tel ég að það verði gífurleg lyftistöng fyrir svæðið. Fjölnota íþróttahús fyrir grunnskólastarf, íþróttastarf, eldri borgara starf og svo ný sundlaug einnig. Ungmennafélagið Ólafur Pá rekur mjög flotta líkamsræktarstöð í Búðardal og er hún mikið notuð af íbúum. Á Reykhólum er íþróttahús og sundlaug sem nýtist vel. Hestamannafélagið á reiðhöll og völl. Íþróttahús og sundlaug eru á Laugum í Sælingsdal og þar hefur verið keyrt í íþróttastarf yfir vetrartímann síðustu vetur. Íþróttafélagið Undri er nýtt félag sem heldur námskeið og/eða kynningu á íþróttagreinum, stundum nokkrar vikur í senn, til að hafa starfið eins fjölbreytt og hægt er en það veltur vissulega á mannskapnum sem hér býr upp á hvað hægt er að bjóða. Nýja húsið eykur vonandi áhuga á því að fá fólk til að koma hingað og hver veit nema að þá aukist framboðið af fólki sem er tilbúið að taka þátt í íþrótta- og tómstundastarfinu á svæðinu. Við erum afar háð mannauðinum á svæðinu. Það er mikilvægt að við séum jákvæð, lausnamiðuð, til í samvinnu og að sýna samheldni en með því verður okkar svæði með mikið aðdráttarafl,“ segir Jóhanna.

Aukning eða samdráttur

Hefur Jóhanna orðið vör við samdrátt eða aukningu í íþróttastarfi? „Það hefur verið fjölgun iðkenda síðustu ár á sambandssvæðinu og má það líklega rekja til aukinnar fjölbreytni og starfs á ársgrundvelli. Á svæðinu er að finna flott fólk sem er að standa sig vel og er tilbúið að gefa sig í starfið og mæta iðkendum. Dalamegin stöndum við þó frammi fyrir því í vetur að það vantar mannskap til að þjálfa og er það ákveðin hindrun því þetta veltur allt á því fólki sem við höfum eins og áður sagði. Á Reykhólum og hér í Dölunum hefur verið boðið upp á námskeið í ýmsum íþróttum og er nú ein vinsælasta íþróttin á Reykhólum bogfimi sem er gaman að fylgjast með og vonandi viðhelst sá áhugi. Í fyrravetur var fimleikaþjálfari í Dölunum og þá voru fimleikarnir afar vinsælir,“ segir Jóhanna og bætir svo við: „Glímufélagið er að gera vel í sínu starfi og eru með slatta af iðkendum sem einnig fara á mót og standa sig vel. Hestamannafélagið heldur alltaf úti starfsemi og heldur námskeið og mót. En þar er þátttaka mismikil milli ára. Fótboltinn er ávallt vinsæll og Undri hefur farið á nokkur mót með góðan hóp. Fámennið gerir þó það að verkum að ekki næst alltaf í lið. En þá er gott að eiga góða granna eins og sagt er og hafa nokkrir sótt æfingar hjá Skallagrími í Borgarnesi og hjá ÍA,“segir Jóhanna.

Sjálfboðaliðar

En hvernig er staðan á sjálfboðaliðastarfi í Dalabyggð? „Margir eru til í að aðstoða en þetta vill þó dálítið lenda á sama fólkinu. Sum félög eru virkari en önnur félög en þetta snýst mikið um einmitt stefnumótun. Það er mikilvægt að fólk viti út í hvað er verið að fara þegar eftir þeirra kröftum er sóst eða þegar viðkomandi býður sig fram og þau hafi eitthvað til að stefna að.

Samstarf á Vesturlandi

Hversu mikilvægt er þetta samstarf á milli UMSB, ÍA, HSH og UDN? „Samstarfið er geysilega mikilvægt þar sem hægt er að fá samtal ef það séu einhverjir óvissuþættir í starfinu, hlusta á gagnrýni og jákvæðni um starfið ásamt því að fá önnur sjónarhorn á starfið og samræma ákveðna þætti. Það er mikilvægt að það séu ekki allir að finna upp hjólið. Tilkoma svæðisskrifstofa víðs vegar um landið er gríðarlega spennandi möguleiki. Starf þeirra er vissulega ekki fullmótað enn, enda að mörgu að hyggja. Draumurinn er vissulega sá að þetta efli allt starf og að hægt verði að ná til allra barna og ungmenna. Hver veit nema þetta geti opnað á möguleikann að til verði farandsþjálfari þ.e. þjálfari frá ÍA eða UMSB geti aðstoðað UDN í viku og komið með nýja innsýn hjá krökkum og á móti gæti þjálfari frá UDN farið til HSH og komið með nýja innsýn hjá krökkum þar og svo framvegis. Samstarfið gæti þá verið í flæði og þjálfarar og starfsfólk kynnt sér aðstöðu hinna deildanna. Ég held að það muni styrkja allt það góða starf sem er að finna í kringum íþróttir hér á Vesturlandi,“ segir Jóhanna að endingu.

Mjög jákvæð teikn á lofti hér á svæðinu

Jóhanna Sigrún Árnadóttir, formaður UDN, tekin í spjall

Jóhanna Sigrún Árnadóttir, formaður UDN, tekin í spjall