Rætt við úrsmiðinn Guðmund B. Hannah á Akranesi

Laugardaginn 9. mars næstkomandi verða 40 ár síðan úrsmiðurinn Guðmundur B. Hannah opnaði úra- og skartgripaverslun sína á Laugavegi í Reykjavík árið 1984. Sex árum síðar, árið 1990, keypti hann af Helga Júlíussyni úrsmið verslun hans á Suðurgötu 65 á Akranesi og er Guðmundur þar enn starfandi, 34 árum síðar. Úrsmiður hefur reyndar verið starfandi í þessu húsi við Suðurgötuna alveg frá því að það var byggt árið 1959. Þá fékk þetta hús við Suðurgötuna, vegna stærðar sinnar, nafnið „Lesbókin“ sem festist við það en það var byggt rétt á eftir Morgunblaðshöllinni í Reykjavík.

Guðmundur var í viðtali í Skessuhorni í byrjun júní 2010 þegar 20 ár voru frá því hann opnaði verslun á Akranesi. Þar kemur fram að Guðmundur er fæddur og uppalinn í miðbænum í Reykjavík og var mikið að leika sér í Grjótaþorpinu þegar hann var barn. Faðir hans, Eggert Hannah, var úrsmiður og hjá honum lærðu margir gamalkunnir úrsmiðir, þeirra á meðal Helgi Júlíusson á Akranesi. Það voru þau tengsl og einnig vinatengsl sem urðu til þess að Guðmundur tók við af Helga á Skaganum. „Ég hafði reyndar falast eftir því við Helga að ég keypti af honum þegar ég kom úr danska úrsmiðaskólanum árið 1983 en þá vildi hann ekki selja. Það var síðan árið 1989 sem Helgi hefur samband og bauð mér þá verslunina til kaups. Það tók mig tæpt ár í að taka ákvörðun og það sem réði úrslitum var að við áttum þá nýfæddan son sem við vildum frekar ala upp á Akranesi en í Reykjavík,“ sagði Guðmundur fyrir tæpum 14 árum og þau eru hér enn og alls ekki á förum.

Hefur alltaf nóg fyrir stafni

Blaðamaður Skessuhorns kom við hjá Guðmundi á dögunum í tilefni þessara stóru tímamóta og tók hann í stutt spjall. Guðmundur er þægilegur í viðmóti með rólegt yfirbragð og það þekkja allir þeir viðskiptavinir sem hafa komið til hans í gegnum tíðina. Hann byrjaði 19 ára gamall að læra úrsmíði og því búinn að vera í þessum bransa í 48 ár. En hverjar eru svona helstu breytingarnar síðustu ár hjá þér? „Snjallúrin hafa komið inn sem við köllum ekki úr heldur tölvur. Ég sjálfur hef alltaf nóg fyrir stafni að gera við úr og gamlar klukkur og svo eigum við fullt af góðum viðskiptavinum sem koma reglulega til okkar. Við bjóðum upp á gjafavörur, úr, skartgripi, skírnargjafir og fæðingargjafir. Svo er ég með bikara til sölu og áletrunarþjónustu. Á sumrin er nóg að gera í áletrunum, þá eru fótboltamót, golfmót og frímúraramót sem ég sé um. Ég og konan mín, Svandís Rögnvaldsdóttir, vinnum tvö hérna og það er bara fínt.“

Guðmundur segir að gamlir brottfluttir Skagamenn komi oft í heimsókn bara til að upplifa gamla tímann því verslunin sé með gamalt yfirbragð. „Verslunin hefur ekki mikið breyst á þessum tíma og haldið sínu öll þessi ár í útliti sem er bara jákvætt. Þegar við opnuðum árið 1990 þá keypti ég ný afgreiðsluborð, skipti út hillum og fékk nýjar sem voru allar smíðaðar á Skaganum.“ Guðmundur segir að þeim hjónum hafi alltaf liðið rosalega vel frá því þau komu á Skagann. En hvað er það skemmtilegasta við að vera úrsmiður? „Nú til dæmis það að hitta alla góðu viðskiptavinina, það lífgar upp á daginn og einnig ef maður er að gera við úr og klukkur.“

*Ýmsar gjafavörur eru til sölu í versluninni.*

Hefur hækkað í forgjöfinni

Opið er í versluninni frá klukkan 11-18 alla virka daga og á laugardögum frá 11-13. Hver eru svona aðaláhugamálin fyrir utan vinnu? „Það er golfið, ég og frúin erum saman í golfinu. Ég byrjaði í því þegar ég var nítjan ára og svo hætti ég þegar ég flutti til Reykjavíkur. Svo þegar við komum á Skagann þá byrjaði ég aftur.“ En hvernig ertu í golfinu? „Ég hef reyndar hækkað í forgjöfinni undanfarið, er kominn í rúmar 20 en var í 15 þegar best lét. Þetta er skemmtilegur félagsskapur og góð útivera. Við hjónin förum yfirleitt eftir vinnu þegar golftímabilið hefst.“

Guðmundur segir að hann hafi einnig verið með bíladellu í gegnum árin og hafi yfir ævina átt yfir 40 bíla. R 260 blasir við uppi á vegg og segir Guðmundur að það númer hafi hann erft eftir pabba sinn. „Ég er með það einkanúmer á jeppanum mínum og stórir jeppar eru í miklu uppáhaldi hjá mér. Skemmtilegasti bíll sem ég hef átt er Toyota Foreigner 85 módel sem ég flutti inn frá Kanada. Við fórum oft áður fyrr í ferðir á veturna með krakkana okkar með 4×4 klúbbnum á Vesturlandi og það voru oft skemmtilegar ferðir með góðu fólki.“ En hvaðan kemur nafnið Hannah? „Ég er skírður í höfuðið á afa mínum frá Hólmavík, Guðmundi Bergmann. Hannah er ættarnafnið hans pabba og það kemur frá Skotlandi.“

Börn þeirra hjóna, Geir og Sigurbjörg, búa bæði í Mosfellsbæ og því stutt að fara til að kíkja í heimsókn. Geir er lögfræðingur og Sigurbjörg er lærður kokkur. Nú ert þú að verða 67 ára í byrjun júní, hvernig sérðu fyrir þér næstu ár? „Ég ætla bara að vinna þangað til ég ákveð að hætta. Það eru nokkrir ungir sem eru að læra úrsmiðinn og það er aldrei að vita hvort einhverjir vilji kaupa og taka við af mér. Þetta er upplagt fyrir úrsmið eða gullsmið að koma hingað, það væri alveg upplagt held ég,“ segir úrsmiðurinn Guðmundur að endingu.

Úrsmiður í tæp fimmtíu ár

Rætt við úrsmiðinn Guðmund B. Hannah á Akranesi

Rætt við úrsmiðinn Guðmund B. Hannah á Akranesi