Síðastliðinn fimmtudag stóð Borgarbyggð fyrir kynningu og umræðu um nýtt atvinnusvæði við Vallarás í Borgarnesi. Vallarás er iðnaðar- og athafnasvæði og efsti hluti byggðarinnar í Borgarnesi og liggur næst hesthúsahverfinu. Svæðið liggur vel við umferð, er á krossgötum vestur, norður og suður. Að sögn Stefáns Brodda Guðjónssonar sveitarstjóra Borgarbyggðar, eru gríðarlegir möguleikar fólgnir í svæðinu og sér hann fyrir sér fjölbreytta atvinnustarfsemi rísa þar á komandi árum.

„Þarna geta stærri og smærri fyrirtæki fengið aðstöðu og felur þetta atvinnusvæði við Vallarás því í sér mikil tækifæri. Á lóðunum er heimilt að byggja allt að þriggja hæða hús en lóðirnar standa við fimm botnlanga en gatnahönnun fyrir allt svæðið stendur nú yfir. Í framkvæmdaáætlun sveitarfélagsins er gert ráð fyrir að framkvæmdir geti hafist í sumar en hægt verður að stýra framkvæmdahraða eftir eftirspurn,“ sagði Stefán Broddi sveitarstjóri í kynningu sinni á fimmtudaginn.

*Skipulag svæðisins. Teikning: Borgarbyggð*

Opið hús þar sem atvinnulóðir við Vallarás voru kynntar