Nýr undirleikari kynntur til leiks

Karlakórinn Söngbræður er að hefja vordagskrá kórsins og er sitthvað á döfinni. Fyrstu tónleikarnir verða í Tónbergi á Akranesi fimmtudagskvöldið 7. mars klukkan 20. Miðar verða seldir við innganginn og kosta 3.000 krónur. Næst á dagskrá kórsins eru tónleikar laugardaginn 16. mars kl. 16 í Félagsheimilinu á Hvammstanga. Fimmtudagur 11. apríl kl. 20 verða tónleikar í Borgarneskirkju og laugardaginn 20. apríl kl 20 verða tónleikar í Digraneskirkju í Kópavogi. Á sumardaginn fyrsta fimmtudaginn 25. apríl verður svo haldið í árlega ferð og sungið fyrir íbúa á Hjúkrunarheimilinu Fellsenda í Dölum sem og fyrir íbúa á dvalarheimilinu Silfurtúni í Búðardal. Að kvöldi þess dags verða svo tónleikar í Hólmavíkurkirkju kl. 20.

„Dagskráin hjá okkur verður fjölbreytt,“ segir Viðar Guðmundsson kórstjóri. „Nokkrar nýjungar eru væntanlegar þó svo að stjórn og formaður hafi setið lengur en elstu menn muna, en við kynnum til leiks nýjan undirleikara, Kjartan Valdimarsson,“ segir Viðar.

*Kórinn kynnir til leiks Kjartan Valdemarsson undirleikara.*

Kjartan Valdemarsson er djasspíanóleikari og tónskáld og undirleikarinn sem Viðar vísar til. Kjartan nam píanóleik við Tónlistarskóla Mosfellsbæjar áður en hann hélt til Bandaríkjanna, þar sem hann stundaði nám við Berklee College of Music 1985-1989. Hann er kennari við Tónlistarskóla FÍH, auk þess að starfa sem píanóleikari við Listdansskóla Íslands og Íslenska dansflokkinn. Kjartan hefur leikið með flestum íslenskum djasstónlistarmönnum og einnig spilað mikið af popptónlist, m.a. með hljómsveitinni Todmobile. Hann hefur starfað í leikhúsum og unnið mikið í hljóðverum, bæði sem hljómborðsleikari og upptökustjóri. Kjartan er einnig eftirsóttur útsetjari, en hann hefur gert mikið af útsetningum, m.a. fyrir Sinfóníuhljómsveit Íslands og Stórsveit Reykjavíkur. Kjartan er afkastamikið tónskáld og hefur meðal annars gert tónlist fyrir sjónvarp, til dæmis fyrir Spaugstofuna og Áramótaskaupið.

Í væntanlegri vordagskrá Söngbræðra munu nýir menn stíga á stokk sem einsöngvarar ásamt því að syngja tvísöng.

Söngbræður hefja vordagskrá sína með tónleikum í Tónbergi á fimmtudaginn

Nýr undirleikari kynntur til leiks

Nýr undirleikari kynntur til leiks