Guðrún Karítas bætir þessa dagana Íslandsmet í hverju kasti

Guðrún Karítas Hallgrímsdóttir er 22 ára og frá Vatnshömrum í Andakíl. Hún byrjaði ung að æfa íþróttir og var öflug í fótbolta, körfubolta og frjálsum íþróttum. Hún æfði kúluvarp á yngri árum en vill þó meina að hún hafi ekki verið sérlega góð í greininni. „Ég fór að leita mér að kastþjálfara og móðir mín hafði samband við ÍR og þar fór ég að prófa mig áfram í kringlukasti og sleggjukasti,“ segir Guðrún þegar blaðamaður hringir til hennar hvar hún býr í Virginíu-hreppi í Bandaríkjunum. Þar stundar Guðrún nú nám. „Ég fann að þetta væri eitthvað sem ég gæti bætt mig í, náði tökum á tækninni nokkuð fljótlega og fannst félagsskapurinn frábær. Eins var kúluvarparinn Sigursteinn Ásgeirsson líka hjá ÍR en við höfðum verið að æfa í gegnum Unni Jónsdóttur frjálsar íþróttir hjá UMSB í gegnum tíðina.“ Guðrún náði ung mjög góðum árangri í sleggjukasti og úr varð að henni var boðið fullur skólastyrkur í námi í Bandaríkjunum sem hún tók fegins hendi.

*Guðrún Karítas á verðlaunapalli þar sem hún hefur verið tíður gestur að undanförnu.*

Mismunandi áskoranir í hverri keppni

Guðrún Karítas er hluti af Afrekshópi ungmenna hjá FRÍ og stundar háskólanám og æfir sleggjukast í VCU háskólanum í Richmond í USA. Hún nefnir að frjálsíþróttaheimurinn þar sé svipaður og heima á Íslandi. „Þetta er ekki stærsta íþróttin, ekki eins mikil umfjöllun og hjá til dæmis amerískum fótbolta eða körfubolta. En umgjörðin er mikið stærri í frjálsum íþróttum hér úti, þar sem það eru þjálfarar sem sjá algjörlega um íþróttafólkið og svo er það auðvitað samkeppnin hér úti. Heima á Íslandi var ég ávallt að keppa á móti bestu vinkonu minni aftur og aftur en hér úti er það mismunandi áskoranir í hverri keppni, þar sem íþróttafólk kemur víða að frá hinum og þessu fylkjum Bandaríkjanna,“ segir Guðrún en bætir við að þjálfunin sé á mjög háu þrepi. „Þetta er allt öðruvísi að vera með nokkra þjálfara sem eru hundrað prósent í vinnu við að þjálfa. Þjálfarar sem eru með mismunandi áherslur og mismunandi sjónarhorn er gríðarlega mikilvægt í öllum íþróttum, myndi ég segja.“

Guðrún Karítas byrjaði árið 2023 á að keppa í lóðakasti (9,08kg) á innanhússtímabilinu þar sem hún á síðasta móti tímabilsins sló Íslandsmet í greininni með kasti upp á 20,03 m. Í ár hefur hún kastað lengst 22,44 m í lóðakasti. Í sleggjukastinu bætti hún sig um rúma 5 metra og kastaði lengst 65,42. Hún hlaut nokkur einstaklingsverðlaun í deildinni sem háskólinn hennar keppir í (Atlantic 10) auk þess að verða svæðismeistari bæði í lóðakasti og sleggjukasti.

Venjulegur skóladagur í Virginíu

En hvernig eru dagarnir hjá Guðrúnu? „Ég fer á kastæfingar á morgnana, geng á milli skólastofa eftir það, og svo taka við lyftingaæfingar eftir skólann. Kastþjálfarinn og lyftingaþjálfari vinna mikið saman og er ávallt fínt samband þar á milli. Lærdómurinn tekur svo við eftir lyftingaæfingarnar og er því mikið að gera hjá mér núna, sem mér finnst mjög gaman. Finnst mjög gott að vera svona upptekin,“ segir Guðrún og brosir.

Guðrún Karítas kastaði sleggjunni lengst 65,52 m á árinu 2023 en hafði árið 2022 kastað lengst 60,14 m. „Ég er búin að vera að bæta mig mjög mikið síðastliðin ár og ég hef verið að kasta, að mér finnst mjög vel.“ Guðrún hefur verið að keppa innanhúss í lóðakasti og hefur verið að setja Íslandsmet í hvert skipti sem hún hefur snert 9,08 kílóa lóð. Framundan er fjöldinn allur af mótum.

„Ég á þrjár vikur eftir innanhúss, svæðismeistaramót og háskólameistaramót en svo breytist tímabilið í utanhússtímabil í lok mars og byrjun apríl. Þá eru mót í Texas og Flórída sem ég stefni á og svo í byrjun júní eru nokkur mót sem ég stefni á,“ en skólinn hjá Guðrúnu klárast í byrjun maí. „Ég er að læra líffræði og það eru margar áttir sem ég get farið eftir námið en ég er ekki enn búin að ákveða í hvaða átt ég ætla að fara.“

Háleit markmið

„Meistaramótið heima á Íslandi er í lok júní og EM er á svipuðum tíma og þegar tímabilið er að klárast hér í Bandaríkjunum. Ég veit ekki hvar ég stend varðandi EM en það verður bara að koma í ljós. Aðal markmið mitt, og held það sé nú fyrir allt íþróttafólk, er að komast einhvern tímann á Ólympíuleika. Held það sé knappt í ár að komast til Parísar en vonandi að ég haldi áfram að bæta mig og nái því markmiði einhvern tímann á ferlinum,“ segir Guðrún.

Heim til Íslands

Nú þegar skólagöngu Guðrúnar er að ljúka í Virginíu-hreppi langaði blaðamann að forvitnast hvað væri framundan hjá henni? „Ég kem heim um miðjan júní og verð mikið í Reykjavík, þar sem ég er að æfa með ÍR og verð að vinna auk þess í Reykjavík. Seinna í sumar næ ég vonandi að koma mér heim í Borgarfjörðinn en verð örugglega mikið til í Reykjavík. Mig langar til að vinna með börnum og þá eitthvað tengt heilsugeiranum en er ekki enn komin með hugmynd hvað það nákvæmlega verður.“

Guðrún Karitas segir að árangur og þátttaka fari upp og niður á milli árganga og er það í öllum íþróttum. „En það er að koma upp stór hópur af íþróttafólki í frjálsum, bæði í gegnum UMSB og yfir allt landið, sem er gríðarleg hvatning til að halda áfram og gera betur. Bæði fyrir frjálsíþróttafólk og þjálfara,“ sagði Guðrún að endingu en vill nota tækifærið og skila kveðju til fólksins heima.

Setur stefnuna á Ólympíuleikana

Guðrún Karítas bætir þessa dagana Íslandsmet í hverju kasti

Guðrún Karítas bætir þessa dagana Íslandsmet í hverju kasti